Չինական ընկերությունը աշխատակիցներին 14 000 դոլար կվճարի երրորդ երեխայի ծննդյան համար

Dabeinong Technology Group չինական ընտանի կենդանիների սննդի ընկերությունը որոշել է իր աշխատակիցներին վճարել 14 000 դոլար նպաստ երրորդ երեխայի ծննդյան համար։ Այս մասին հայտնել է «Itsai Global» տեղեկատվական ռեսուրսը։

Dabeinong Technology Group-ն իր աշխատակիցներին կվճարի 4,7 հազար դոլար՝ առաջին երեխայի ծննդյան համար, 9,4 հազար դոլար՝ երկրորդ երեխայի և 14 հազար դոլար՝ երրորդ երեխայի ծննդյան համար։ Նպաստները սկսել են վճարվել հունվարի 1-ից։

Ընկերությունն առաջարկում է նաև լրացուցիչ ծնողական արձակուրդ օրենքով սահմանված եռամսյա ծննդաբերության արձակուրդից հետո:

Dabeinong Technology Group-ում աշխատում է ավելի քան 20 հազար մարդ։

Ընդգծվում է, որ ընկերության ղեկավարության այս որոշումը կապված է Չինաստանի իշխանությունների՝ երկրում ծնելիությունը խթանելու ջանքերի հետ։