Թուրքիան ապակայունության աղբյուր է. Եվրախորհրդարան

Եվրախորհրդարանը «Եվրամիության ընդհանուր անվտանգության և պաշտպանական քաղաքականության մասին» զեկույցում Թուրքիային որակել է  որպես «ապակայունության աղբյուր»։

Այս մասին, ինչպես հաղորդում է «Արմենպրես»-ը, հայտնում է dw.com-ը:

«ԵՄ ընդհանուր անվտանգության և պաշտպանական քաղաքականության մասին» զեկույցում, որը կազմվել է Լիբերալների խմբի անդամ, ֆրանսիացի պատգամավոր Նատալի Լոիզոյի կողմից, նշում է, որ Թուրքիան հաճախ ապակայունացնող դեր է խաղում ԵՄ-ի և նրա հարևանների համար անհանգստացնող բազմաթիվ ոլորտներում, հետևաբար, սպառնում է տարածաշրջանային խաղաղությանը, անվտանգությանն ու կայունությանը։

Զեկույցում դատապարտվել են հատկապես Թուրքիայի  անօրինական գործողությունները ԵՄ անդամ երկրների, հատկապես Հունաստանի և Կիպրոսի դեմ, ինչպես նաև Արևելյան Միջերկրական ծովում ռազմական հակամարտության սպառնալիքները, իրավասության տակ գտնվող ծովային հատվածներում Թուրքիայի հայտարարած նոր անօրինական գործողությունները։

Նշվում է, որ չնայած լարվածությունը թուլացնելու ջանքերին, թուրքական ռազմական նավերի սադրիչ գործողությունները և ագրեսիայի սպառնալիքները MED IRINI գործողության դեմ (ՄԱԿ-ի կողմից Լիբիայի դեմ ռազմական էմբարգոն վերահսկելու առաքելությամբ), որոնք խախտում են միջազգային իրավունքը և ԵՄ անդամ երկրների ինքնիշխանությունը ցավալի են:

Զեկույցում նշվել է նաև, որ  ԵՄ-ն ունի բավարար կամք օգտագործելու իր տրամադրության տակ եղած բոլոր գործիքներն ու տարբերակները՝ իր անդամ երկրների և իր շահերը և տարածաշրջանային կայունությունը պաշտպանելու համար: