ԱՄՆ-ն, Լեհաստանը և ԵԱՀԿ-ն ժամանակավորապես տարհանում են իրենց առաքելությունների անդամներին Ուկրաինայից

Ուկրաինայում ԱՄՆ դիվանագիտական ​​կորպուսի մեծ մասն այժմ աշխատում է Լեհաստանից։ Այս մասին հայտնում է ТАСС-ը՝ վկայակոչելով Reuters-ը:
«Մենք անընդհատ կգնահատենք անվտանգության հետ կապված իրավիճակը՝ որոշելու համար, թե երբ է անվտանգ ԱՄՆ կառավարության աշխատակիցների վերադարձն Ուկրաինա»,- ասել է պաշտոնյան։

Ավելի վաղ ԱՄՆ-ն որոշել էր ժամանակավորապես Ուկրաինայում իր դեսպանատունը Կիեւից Լվով տեղափոխել։ Վերջին օրերին ամերիկյան դիվանագիտական ​​կորպուսի ներկայացուցիչներն աշխատում էին Լվովից եւ գիշերելու համար՝ մեկնում Լեհաստան։ Հինգշաբթի CNN-ը հայտնել է, որ բոլոր ամերիկացի դիվանագետներն այժմ Ուկրաինայի սահմաններից դուրս են գտնվում։

ԵԱՀԿ գլխավոր քարտուղար Հելգա Շմիդն իր հերթին հայտնել է, որ որոշել է որքան հնարավոր է շուտ Ուկրաինայից ժամանակավորապես տարհանել ԵԱՀԿ առաքելության բոլոր անդամներին։

«Ուկրաինայում շարունակվող ռազմական գործողությունների եւ անվտանգության վատթարացման կապակցությամբ, գործող նախագահի հետ համաձայնությամբ, ես որոշում եմ կայացրել որքան հնարավոր է շուտ ժամանակավորապես տարհանել Ուկրաինայից միջազգային առաքելության բոլոր անդամներին»,- ասվում է Շմիդի հայտարարության մեջ, որի տեքստը տարածել է ԵԱՀԿ մամուլի ծառայությունը։

Լեհաստանն Ուկրաինայում տիրող իրավիճակի հետ կապված որոշել է դադարեցնել չորս գլխավոր հյուպատոսությունների աշխատանքն այդ երկրում։ Լեհաստանի ԱԳՆ-ի տվյալներով՝ դեսպանատունը Կիեւում եւ գլխավոր հյուպատոսությունը Լվովում կշարունակեն աշխատել։ «Մենք դիվանագիտական ​​եւ հյուպատոսական ներկայություն ենք պահպանում Կիեւում Լեհաստանի Հանրապետության դեսպանատանը եւ Լվովում Լեհաստանի Հանրապետության գլխավոր հյուպատոսությունում»,- ասվում է հաղորդագրության մեջ։

«Անվտանգության նկատառումներից ելնելով Ուկրաինայում Լեհաստանի հյուպատոսական առաքելությունների գործունեությունը ժամանակավորապես դադարեցվել է»,- հավելել են ԱԳՆ-ում։ Խոսքը Խարկովում, Լուցկում, Օդեսայում եւ Վիննիցայում հյուպատոսությունների մասին է։