Էրդողանը բողոքել է ԵՄ-ի` Թուրքիայի նկատմամբ վերաբերմունքից

Թուրքիայի նախագահ Ռեջեփ Թայիփ Էրդողանը դրական է համարում ԵՄ-ի պատրաստակամությունը` դիտարկելու Ուկրաինայի` միությանն անդամակցելու հեռանկարը, սակայն նշել է, որ Անկարայի հետ կապված ԵՄ-ն նման նախաձեռնություններ չի ցուցաբերել։ Այդ մասին նա հայտարարել է երեքշաբթի Անկարայում կայացած մամուլի ասուլիսում, որը հեռարձակել է NTV հեռուստաալիքը։

«Մենք բարձր ենք գնահատում ԵՄ-ի ջանքերը Ուկրաինայի անդամակցության համատեքստում: Սա հիանալի իրադարձություն է: Բայց նույն զգայունությունը ցուցաբերեք Թուրքիայի նկատմամբ: Ինչո՞ւ եք դեռ կասկածում մեր վերաբերյալ: Կամ մենք պետք է հարձակման ենթարկվե՞նք, որպեսզի դա [ԵՄ անդամակցությունը] հայտնվի ձեր օրակարգում»,- ասել է նա: Էրդողանը հիշեցրել է, որ երկար տարիներ ԵՄ-ն դանդաղեցնում և ձգձգում է հանրապետության անդամակցության գործընթացը։

Թուրք առաջնորդը նշել է, որ ԵՄ շատ երկրներ նույնպես ՆԱՏՕ-ի շրջանակներում Թուրքիայի դաշնակիցներն են, սակայն, Թուրքիայի հետ ռազմարդյունաբերական համալիրի միջոցով համագործակցության ոլորտում «նրանք իրենց ոչ անկեղծ են պահում»։ «Կան ԵՄ երկրներ, որոնց հետ մենք պետք է համագործակցենք, բայց նրանց դիրքորոշումը հեռու է համերաշխության ոգուց, ինչո՞ւ մեզ չեք տալիս անհրաժեշտ զինամթերքը, այլ միջոցներ, սա մեր գործընկերության պահանջն է, բայց նրանք չեն տալիս: Սպասու՞մ են, որ պատերազմ սկսվի, ՆԱՏՕ-ն ու ԵՄ-ն դատարկախոսում են»,- ասել է նա։ Էրդողանը ուշադրություն է հրավիրել այն փաստի վրա, որ «երբ խնդիրներն Ուկրաինային հարվածեցին, [Ուկրաինայի նախագահ Վլադիմիր] Զելենսկին ելույթ ունեցավ Եվրախորհրդարանում, և նա արժանացավ բուռն ծափահարությունների»։

ՆԱՏՕ-ի ընդլայնման հարցի վերաբերյալ Էրդողանը նշել է, որ Թուրքիան «դեմ չէր դրան և մնում է նման գործընթացի կողմնակից»։ Նրա կարծիքով՝ ՆԱՏՕ-ի ընդլայնումը խաղաղություն ապահովելու միջոց է։ Խոսելով Ուկրաինայում ռուսական հատուկ գործողության հետ կապված իրավիճակի մասին՝ Էրդողանը ևս մեկ անգամ կոչ է արել երկու կողմերին «անհապաղ դադարեցնել կրակը և նպաստել համաշխարհային խաղաղությանը»։