ՄԱԿ-ն արձագանքել է խաղաղապահներ ուղարկելու Ուկրաինայի խնդրանքին

ՄԱԿ-ի գլխավոր քարտուղարի պաշտոնական ներկայացուցիչ Ստեֆան Դյուժարիկը մեկնաբանել է Գերագույն ռադայի կոչը՝ Ուկրաինայում խաղաղապահներ տեղակայելու վերաբերյալ։ Այս մասին հայտնում է «ՌԻԱ Նովոստի»-ն։

Ճեպազրույցում պատասխանելով Ուկրաինայի խնդրանքով խաղաղապահներ ուղարկելու հնարավորության մասին հարցին՝ Դյուժարիկը ասել է. «Կան որոշակի ընթացակարգեր։ Դա պետք է որոշի ՄԱԿ-ի Անվտանգության խորհուրդը»:

ՄԱԿ-ի Անվտանգության խորհրդում «ՌԻԱ Նովոստի»-ի աղբյուրի փոխանցմամբ՝ ներկայումս Ուկրաինա խաղաղապահներ ուղարկելու վերաբերյալ քննարկումներ չկան։

Հիշեցնենք, որ մարտի 3-ին Ուկրաինայի Գերագույն ռադան դիմել էր ՄԱԿ-ին և այլ միջազգային կազմակերպությունների՝ խնդրելով խաղաղապահներ մտցնել Ուկրաինայի տարածք և սահմանել ոչ թռիչքային գոտի։ Ռադայի ընդունած բանաձեւը պարունակում է նաև խնդրանք՝ ուղղված ՄԱԿ-ի գլխավոր քարտուղար Անտոնիո Գուտերեշին՝ միջնորդ դառնալու հակամարտության կարգավորման հարցում։