ՌԴ ՊՆ-ն Ուկրաինայում ստեղծված իրավիճակի վերաբերյալ մանրամասներ է ներկայացրել

Ռուսական զինված ուժերը առաջ են շարժվում լայն ճակատով՝ հարակից թևերում Դոնեցկի Ժողովրդական Հանրապետության ստորաբաժանումների հետ գործելով և ազատագրելով նոր բնակավայրեր։ Այս մասին հայտարարել է ՌԴ ՊՆ պաշտոնական ներկայացուցիչ, գեներալ-մայոր Իգոր Կոնաշենկովը։

Նշվում է, որ վերահսկողության տակ են վերցվել Պյատիխատկի, Շևչենկովո, Պոլոգի, Գուսարկա, Նովոդանիլովկա և Շչերբակի բնակավայրերը։

ԴԺՀ-ի զինված ուժերը վերահսկողության տակ են վերցրել Ռոզովկա, Տրուժենկա, Զնամենովկա և Պուզատոյե բնակավայրերը։

ԼԺՀ-ի զորքերի խումբը, շարունակելով հարձակողական գործողությունները, գրավել է Շանդրիգոլովո, Ալեքսանդրովկա, Դերիլովո, Սրեդնեե, Լոզովոե բնակավայրերը։

Կոնաշենկովը նաև հայտնել է, որ ուկրաինացի ազգայնականներն արեւմտյան լրագրողների մասնակցությամբ Խարկովում սադրանք են պատրաստում:

«Հաստատված տվյալների համաձայն՝ Կիևսկի շրջանի Ժիլարդի փողոցում, մասնավոր հատվածում, տների միջև տեղադրված են բազմակի հրթիռային համակարգեր։ Ազգայնականներն արգելում են տեղի բնակիչներին, այդ թվում՝ երեխաներին լքել իրենց տները»,- ասել է ՌԴ պաշտպանության նախարարության խոսնակը։

Նրա խոսքով` ներկայումս կայանքները պատրաստ են քաղաքից դուրս տեղակայված ռուսական զինված ուժերի ստորաբաժանումների գնդակոծման համար։

«Սադրանքի նպատակն է ստիպել ռուսական հրետանուն պատասխան կրակ բացել Խարկովի բնակելի հատվածի վրա»,- ասել է նա։

Կոնաշենկովը հավելել է, որ նախատեսվում է այս ամենը նկարահանել տեսախցիկներով՝ նկարահանումները հետագայում արևմտյան լրագրողներին փոխանցելու համար: