Ամերիկացի սենատորը կոչ է արել սպանել Պուտինին. Սպիտակ տունն արձագանքել է նրա հայտարարությանը

ԱՄՆ հանրապետական ​​սենատոր Լինդսի Գրեհեմը կոչ է արել ԱՄՆ նախագահ Ջո Բայդենին կազմակերպել ՌԴ նախագահ Վլադիմիր Պուտինի սպանությունը: Նա հայտարարել է, որ «այս տղային հեռացնողը» «մեծ ծառայություն կմատուցի երկրին ու աշխարհին»։ Քաղաքական գործիչը Twitter-ում հարցրել է, թե Ռուսաստանն ունի՞ իր սեփական Բրուտոսը կամ Կլաուս ֆոն Շտաուֆենբերգը՝ պատմական դեմքեր, որոնք մահափորձ են կատարել համապատասխանաբար Գայոս Հուլիոս Կեսարի և Ադոլֆ Հիտլերի դեմ։

Սենատորի հայտարարությանն անդրադարձել է Վաշինգտոնում Ռուսաստանի Դաշնության դեսպան Անատոլի Անտոնովը, ով նշել է, որ Պուտինի սպանության կոչը հանցավոր է, անընդունելի և զայրացուցիչ։ Նա նաև պահանջել է պաշտոնական բացատրություն և խստորեն դատապարտել հանցավոր ելույթը։

Սպիտակ տան մամուլի խոսնակ Ջեն Փսակին հերթական ճեպազրույցում հայտարարել է, որ «ԱՄՆ հանրապետական ​​սենատոր Լինդսի Գրեհեմի՝ ՌԴ նախագահ Վլադիմիր Պուտինի սպանության կոչը ԱՄՆ կառավարության դիրքորոշումը չէ»։

«Սա Միացյալ Նահանգների կառավարության դիրքորոշումը չէ և, իհարկե, այն հայտարարությունը չէ, որը դուք կլսեք այս վարչակազմում աշխատող որևէ մեկի շուրթերից», - ասել է Փսակին՝ պատասխանելով այն հարցին, թե արդյոք Սպիտակ տունը որևէ կարծիք ունի այս հայտարարության վերաբերյալ:

Նշենք, որ 2019 թվականին Գրեհեմը հայտարարել էր, որ արգելափակել է ավելի քան մեկ դար առաջ Օսմանյան կայսրությունում Հայոց ցեղասպանության ճանաչման մասին բանաձևի ընդունումը Սենատի կողմից:

«Քիչ առաջ հանդիպեցի Թուրքիայի նախագահ Ռեջեփ Թայիփ Էրդողանի և ԱՄՆ նախագահ Դոնալդ Թրամփի հետ և խոսեցի այն խնդիրների մասին, որոնց մենք բախվում ենք Սիրիայում Թուրքիայի ռազմական գործողությունների պատճառով: Ես հույս ունեմ, որ Թուրքիան և Հայաստանը կարող են միասին լուծել այդ խնդիրը»,- ասել էր Գրեհեմը Սենատի նիստի ընթացքում, որ հեռարձակվում էր հեռուստատեսությամբ: