Ջոնսոնը, Թրյուդոն և Ռյուտեն հանդես են եկել համատեղ հայտարարությամբ

Մեծ Բրիտանիայի, Կանադայի և Նիդեռլանդների վարչապետներ Բորիս Ջոնսոնը, Ջասթին Թրյուդոն և Մարկ Ռյուտեն կոչ են արել Ռուսաստանին դադարեցնել կրակն Ուկրաինայում՝ ապահովելու խաղաղ բնակչության անվտանգ ելքը և ապահովելու սննդի և դեղորայքի առաքումը։ Այս մասին երկուշաբթի ասված է առաջնորդների համատեղ հայտարարության մեջ, որը հրապարակվել է Լոնդոնում նրանց հանդիպումից հետո։

 «Մենք կոչ ենք անում Ռուսաստանին կատարել իր պարտավորությունները՝ լիովին հետևելու միջազգային մարդասիրական և մարդու իրավունքների օրենսդրությանը, ինչպես նաև անհապաղ զինադադար՝ ապահովելու խաղաղ բնակչության անվտանգ ելքը, սննդամթերքի և դեղորայքի առաքումը»,- ասվում է փաստաթղթում։

Առաջնորդներն ուշադրություն են հրավիրել «մարդասիրական իրավիճակի շարունակական վատթարացման վրա»։ «Մենք կցանկանայինք հատուկ ուշադրություն դարձնել Ուկրաինայում բռնությունից փախչող կանանց, երեխաների, տարեցների և բնակչության այլ խոցելի կատեգորիաների ծանր վիճակին»,- ասվում է հայտարարության մեջ։

«Մենք նաև աշխատել ենք մեր գործընկերների հետ՝ նպատակաուղղված պատժամիջոցների աննախադեպ փաթեթ սահմանելու ուղղությամբ՝ ռուսական տնտեսությունը մեկուսացնելու համար, և մենք կշարունակենք պարտադրել Ռուսաստանին լուրջ ծախսեր կրել», - ասվում է փաստաթղթում։

Համատեղ հայտարարության մեջ Ջոնսոնը, Թրյուդոն և Ռյուտեն նաև կոչ են անում աշխարհին տրամադրել Ուկրաինային լրացուցիչ հնարավորություններ՝ իր տարածքի պաշտպանությունն իրականացնելու համար։ «Մենք կոչ ենք անում միջազգային հանրությանը աջակցել Ուկրաինայի ինքնապաշտպանության իրավունքին և արձագանքել Ուկրաինայի կոչերին՝ ուժեղացնելու նրա ինքնապաշտպանական կարողությունները: Մենք կշարունակենք դա անել և Ուկրաինային տրամադրել լրացուցիչ պաշտպանական օգնության փաթեթներ»,- ասվում է հայտարարության մեջ: