Բալթյան երկրները մտադիր են հրաժարվել ռուսական էլեկտրաէներգիայից

Լատվիան, Լիտվան և Էստոնիան որոշել են անջատվել ռուսական էլեկտրացանցից և սինխրոնիզացվել եվրոպականի հետ մինչև 2025 թվականը, հայտնում է լատվիական LSM ռադիո և հեռուստատեսային պորտալը։

Բալթյան երկրները, Լեհաստանը և Եվրահանձնաժողովը 2018 թվականին համաձայնագիր են ստորագրել Լիտվան, Լատվիան և Էստոնիան կցելու եվրոպական էլեկտրացանցերի հետ։ Մինչև 2025 թվականը երեք երկրներ պետք է դուրս գան «Բելառուս, Ռուսաստան, Էստոնիա, Լատվիա, Լիտվա էներգետիկ օղակից» և միանան եվրոպական էներգետիկ համակարգին։ Նման համաձայնագիրը նախատեսում է այդ երկրների «էներգետիկ անկախության» ձեռքբերումը Ռուսաստանից։

Պորտալի տվյալներով՝ Լատվիայի էկոնոմիկայի նախարարը աջակցություն է խնդրել Եվրամիությունից՝ ռուսական էլեկտրամատակարարումը դադարեցնելու որոշումը արագացնելու համար։

Լատվիայի էկոնոմիկայի նախարարության խորհրդարանական քարտուղարի խոսքերով՝ լրացուցիչ միջոցներ կպահանջվեն վաղաժամկետ անջատման համար, սակայն նույնիսկ այժմ նման միջոցը կապահովի էներգամատակարարման ավելի բարձր անվտանգություն։