«Գործը կարճվեց մոտակա ընտրությունների համար». Սիլվա Համբարձումյան

Այսօր լրագրողների հետ հանդիպմանը գործարար Սիլվա Համբարձումյանը ներկայացրեց իր դիրքորոշումը ՀՔԾ–ի որոշման վերաբերյալ։ Հիշեցնենք, որ  դեկտեմբերի 12–ի որոշմամբ Սյունիքի մարզպետ Սուրեն Խաչատրյանի նկատմամբ հարուցված քրեական գործը կարճվել է։ Խոսելով գործը կարճելու պատճառների մասին` Ս. Համբարձումյանը նշեց. «Գործը կարճվեց մոտակա ընտրությունների համար»: Գործարարը շեշտեց, որ որոշումից գոհ է այնքանով, որ մարզպետը գոնե ընդունել է արարքը և գրավոր զղջում հայտնել։ «Ես էլի գոհ եմ, որ նրա նմանը զղջացել է»,– նշեց նա։ Ս. Համբարձումյանի պահանջն այժմ վերաբերում է միայն 102 միլիոն դրամին, որը Սյունիքի մարզպետը պետք է վճարի սարքավորման դիմաց, որը խլել էր իր գործարանից։ 

Իսկ Սիլվա Համբարձումյանի փաստաբան Կարեն Թունյանը գործի կարճման երկու հիմք է տեսնում` ա. Այն, որ մեկ անգամ ապտակելը ծեծ չի համարվում, բ. Որ այդ «ծեծ»–ը հասարակական կարևորություն չի ներկայացնում։ 

Կատարվածից հետո Սիլվա Համբարձումյանը որոշել է դուրս գալ մարզպետի դեմ բոլոր հնարավոր ասպարեզներում։ Գործարարը նույնիսկ պատրաստ է մտնել քաղաքականություն, եթե դա պահանջվի, դնել իր թեկնածությունը խորհրդարանական ընտրություններին, եթե Սուրեն Խաչատրյանը ևս դնի։ 

«Եթե ես որոշեցի քաղաքականության մեջ մտնել, իմացեք, որ կմտնեմ, բայց չեմ ուզում իմ անունը կեղտոտել։ Կպեք Արմեն Մովսիսյանին, որն առանց աճուրդի հանքեր է հանել վաճառքի»,- ավելացրեց Համբարձումյանը։