«Եթե չկար հանցակազմ, ապա ինչու էր զղջացել». Կարեն Թունյան

Այսօր լրագրողների հետ հանդիպմանը գործարար Սիլվա Համբարձումյանի փաստաբան Կարեն Թունյանը ներկայացրեց ՀՔԾ-ի կողմից դեկտեմբերի 12-ին հարուցված քրեական գործը կարճելու մասին որոշման վերաբերյալ իր տեսակետը: Ըստ փաստաբանի փաստաթուղթն ունի որոշակի տարօրինակություններ. «Առաջին տարօրինակությունը, որն առկա է որոշումների մեջ, ինքներդ եք նկատում. եթե չկար հանցակազմ, ապա ինչու էր զղջացել»: Խնդիրը, ըստ Կ. Թունյանի, կայանում է նրանում, որ իրականում շատ վիճելի է՝ մեկ ապտակը ծեծ հանդիսանում է, թե՝ ոչ: Նրա կարծիքով այդ է պատճառը, որ նախաքննություն իրականացնող մարմինը շեշտը դրել է երկրորդ դրույթի վրա, որի պատճառով կարճվել է քրեական գործը, դա արարքի նվազ հասարակական կարևորությունն է: 

«Եթե չկար հանցակազմ և մեկ հարվածը, մեկ հրելն ինքնին չէր նշանակում ծեծ, ինչ կապ ուներ զղջալը և ինչ կապ ուներ արարքի նվազ հասարակական կարևորությունը», - որոշման հաջորդ տարօրինակությունը մատնանշեց փաստաբանը: «Այսինքն, դա իմ անձնական կարծիքն է, բավականին վիճելի է՝ ապտակ է, ծեծ է, թե՝ ոչ, որովհետև հակառակ պարագայում կարելի է փողոցով քայլել և ապտակել ցանկացած մարդու, ու որևէ քրեական պատասխանատվության դրա համար չենթարկվել», - նշեց նա: «Ընդամենը բավական է, որ ապտակը որևէ ֆիզիկական հետք չթողնի, իսկ ապտակները որպես կանոն այդպիսի հետք չեն թողնում, և շատ վիճելի կլինի, թե մարդ ցավ զգացել է, թե՝ ցավ չի զգացել»:

Ինչ վերաբում է գործը կարճելուն, Կ. Թունյանը նշեց, որ իր կարծիքով երկու հիմքով է կարճվել. «Մեկ այն, որ մեկ անգամ ապտակելը չի հանդիսանում ծեծ, և երկրորդ հիմքը, որ արարքը նվազ հանրային վտանգավորություն է իրենից ներկայացնում»: