Արմեն Դանիելյանին կարգապահական պատասխանատվության ենթարկելու միջնորդություն է ներկայացվել ԲԴԽ

«Փաստինֆո»-ի տեղեկություններով՝ Դատավորների ընդհանուր ժողովի Էթիկայի և կարգապահական հանձնաժողովը միջնորդություն է ներկայացրել ԲԴԽ՝ Վերաքննիչ քրեական դատարանի դատավոր Արմեն Դանիելյանին կարգապահական պատասխանատվության ենթարկելու մասին։ 

Բոլոր ժամանակաշրջաններում իշխանությունների և դատախազաքննչական մարմինների կամքը դակող դատավորի համբավ ունեցողներից ամենաէքսցենտրիկ դատավորի՝ Արմեն Դանիելյանի, նկատմամբ կարգապահական վարույթը հարուցվել է Սիսիանի նախկին համայնքապետ, ԱԺ «Հայաստան» խմբակցության պատգամավոր Արթուր Սարգսյանի պաշտպանների հաղորդման հիման վրա։

Հանձնաժողովն արդեն միջնորդությունը ներկայացրել է ԲԴԽ, սակայն Դատական օրենսգրքի 148-րդ հոդվածի համաձայն՝ կարգապահական պատասխանատվության ենթարկելու հարցը լուծելու համար միջնորդություն ներկայացնելու մասին որոշումը և կարգապահական վարույթի նյութերն ստանալու պահից երկու շաբաթվա ընթացքում դատավորն իրավունք ունի ԲԴԽ և վարույթ հարուցող մարմին ուղարկելու պատասխան՝ կցելով էլեկտրոնային կրիչը, անհրաժեշտության դեպքում՝ դատավորի դիմումի հիման վրա պատասխան ներկայացնելու ժամկետը կարող է երկարացվել մեկշաբաթյա ժամկետով, հետևաբար, դատական նիստի օր դեռևս նշանակված չէ։ ԲԴԽ-ից «Փաստինֆո»-ի հետ զրույցում հայտնեցին, որ նիստի օր նշանակելու մասին կտեղեկացնեն։

Հիշեցնենք, որ Արթուր Սարգսյանը կալանավորվել էր Վերաքննիչ քրեական դատարանի դատավոր Արմեն Դանիելյանի որոշմամբ, դատավորն անգամ չէր ծանուցել պաշտպանության կողմին և կալանավորման որոշում կայացրել՝ առանց մեղադրյալին և պաշտպաններին լսելու, իսկ այն բանից հետո, երբ ՍԴ-ն արձանագրել է, որ անազատության մեջ գտնվող պատգամավորի կարգավիճակ չունեցող անձը պատգամավորի կարգավիճակ ձեռք բերելու պահից, չի կարող պահվել անազատության մեջ, Սարգսյանն ազատ էր արձակվել։

Արթուր Սարգսյանի փաստաբանները դեռևս նոյեմբեր ամսին՝ դատավոր Դանիելյանի կայացրած որոշումից անմիջապես հետո հանցագործության մասին հաղորդում են ներկայացրել ՀՀ գլխավոր դատախազություն՝ պահանջելով քրեական գործ հարուցել ակնհայտ ապօրինի դատական ակտ կայացնելու համար, ինչպես նաև՝ դիմել են ՀՀ արդարադատության նախարարությանը և Դատավորների ընդհանուր ժողովի էթիկայի և կարգապահական հարցերի հանձնաժողովին՝ պահանջելով հարուցել կարգապահական վարույթ։

Պաշտպանները պնդում էին, որ դատավորը կայացրել է ակնհայտ ապօրինի դատական ակտ և թույլ է տվել քրեական իրավունքի և դատավարության կարևորագույն սկզբունքների խախտումներ։