Պուտինն ու Մակրոնը քննարկել են Ուկրաինայում տիրող իրավիճակը

Ռուսաստանի եւ Ֆրանսիայի նախագահներ Վլադիմիր Պուտինն ու Էմանուել Մակրոնը քննարկել են Ուկրաինայում տիրող իրավիճակը։

Կրեմլի մամուլի ծառայության հաղորդմամբ՝ Ռուսաստանի նախագահը տեղեկացրել է Դոնբասի հանրապետությունների պաշտպանության հատուկ ռազմական գործողության ընթացքի, այդ թվում՝ Մարիուպոլի ազատագրման եւ «Ազովստալ» գործարանում ազգայնականների կողմից պահվող խաղաղ բնակիչների տարհանման մասին՝ համաձայն ապրիլի 26-ին Վլադիմիր Պուտինի եւ ՄԱԿ-ի գլխավոր քարտուղար Անտոնիո Գուտերեշի հանդիպման ժամանակ ձեռք բերված պայմանավորվածության։

Ուշադրություն է հրավիրվել ԵՄ անդամ երկրների կողմից ուկրաինական ուժայինների ռազմական հանցագործությունների անտեսման, Դոնբասի քաղաքների եւ բնակավայրերի զանգվածային գնդակոծությունների վրա, որոնց հետեւանքով խաղաղ բնակիչներ են զոհվում։ Նշվել է, որ Արեւմուտքը կարող է օգնել կասեցնել այդ վայրագությունները՝ համապատասխան ազդեցություն գործադրելով Կիեւի իշխանությունների վրա, ինչպես նաեւ դադարեցնելով զենքի մատակարարումը Ուկրաինային։

Ռուսաստանի նախագահը ուրվագծել է Ուկրաինայի ներկայացուցիչների հետ բանակցելու սկզբունքային մոտեցումները՝ ընդգծելով, որ չնայած Կիեւի անհետեւողականությանը եւ լուրջ աշխատանքին անպատրաստությանը, ռուսական կողմը դեռ բաց է երկխոսության համար։

Ֆրանսիական կողմը մտահոգություն է հայտնել պարենի համաշխարհային անվտանգության ապահովման առաջացող խնդրի առնչությամբ։ Այս համատեքստում Վլադիմիր Պուտինն ընդգծել է, որ իրավիճակն այս հարցում բարդ է առաջին հերթին արեւմտյան երկրների պատժամիջոցների պատճառով, եւ նշել է համաշխարհային լոգիստիկ եւ տրանսպորտային ենթակառուցվածքների անխոչընդոտ գործունեության կարեւորությունը։

Պայմանավորվածություն է ձեռք բերվել շարունակել շփումները տարբեր մակարդակներում։