«Հասարակության վստահությունը շատ հեշտ է ձեռք բերել, երբ ինքներս ուղղակի ազնիվ ենք լինում մեր նպատակների մեջ». Վլադիմիր Գասպարյան

Դեկտեմբերի 15-ին ՀՀ ոստիկանության պետ, գեներալ-լեյտենանտ Վլադիմիր Գասպարյանը հանդիպեց Երեւան քաղաքի օպերատիվ ծառայությունների աշխատակիցների հետ:

Խոսելով օպերատիվ ծառայության աշխատանքի կարեւորության եւ առանձնահատկությունների մասին՝ ոստիկանության պետն ընդգծեց իր առանձնակի վերաբերմունքը համակարգի գործունեության այդ ոլորտի հանդեպ. «Ես աշխատելու եմ օպերատիվ անձնակազմի հետ: Ինքս օպերատիվ աշխատող եմ եղել եւ աշխատելու եմ ձեզ հետ: Ժամանակն է օպերատիվ աշխատանքով ամրագրել այն բոլոր հաջողությունները, ինչ մենք կունենանք արտաքին ծառայությունում: Հասարակության վստահությունը շատ հեշտ է ձեռք բերել, երբ ինքներս ուղղակի ազնիվ ենք լինում մեր նպատակների մեջ»:

Վլադիմիր Գասպարյանը միեւնույն ժամանակ ընդգծեց, որ առանց ոստիկանության բոլոր օղակների ուժեղացման եւ աշխատանքի արդյունավետության բարձրացման անհնար է լուրջ հաջողություն ակնկալել առանձին վերցված մեկ ոլորտում:

Խոսելով օպերատիվ ծառայությունների խնդիրների մասին՝ ոստիկանության պետը հանձնարարեց կարճ ժամկետում պատշաճ մակարդակ ապահովել աշխատանքային եւ կատարողական կարգապահության ոլորտում, ուժեղացնել փոխգործակցությունը բոլոր այն ծառայությունների հետ, որոնք առնչվում են օպերատիվ ծառայությունների բնագավառին, սերտացնել կապը մարզային ստորաբաժանումների հետ:

Միայն հստակ ու բազմակողմանի համագործակցության դեպքում, ընդգծեց Վլադիմիր Գասպարյանը, հնարավոր կլինի հասնել լուրջ որակական տեղաշարժի:

Ոստիկանության պետը հանդիպման մասնակիցներին կոչ արեց ընթացիկ աշխատանքին զուգահեռ մշտապես ուշադրության կենտրոնում պահել նախկին տարիներին կատարված ու չբացահայտված հանցագործությունների խնդիրը: Անդրադառնալով վերջին օրերին այս կարգի գործերի բացահայտումներին՝ Վլադիմիր Գասպարյանն ընդգծեց. «Տեսնո՞ւմ եք, տղե՛րք, որ ուզում եք, ստացվում է: Ստացվում է եւ՛ նախկինում կատարված հանցագործությունները բացահայտել, եւ արտոնյալ հետախուզվողներ բռնել... Եվ անընդհատ բռնվելու են իրենք»: Հանդիպման մասնակիցների համար անակնկալ էր, որ ոստիկանության պետ, գեներալ-լեյտենանտ Վլադիմիր Գասպարյանը հենց տեղում հրամաններ ստորագրեց, որոնցով խրախուսվեցին ծառայության ընթացքում աչքի ընկած մի շարք աշխատակիցներ: