Լևոնը վստահեցրել է, որ ՀՀ-ում իրավիճակի փոփոխման պարագայում, վերադառնալու է մեր կազմ. Սերժ Սարգսյան

Լևոն Արոնյանի հեռանալը մեծ կորուստ էր։ Նա ինձ վստահեցրել է, որ Հայաստանում իրավիճակի փոփոխման պարագայում, վերադառնալու է մեր կազմ: Այս մասին մայիսի 14-ին Երևանի Տիգրան Պետրոսյանի անվան շախմատի տանը ասել է Հայաստանի շախմատի ֆեդերացիայի նախագահ Սերժ Սարգսյանը, գրում է news.am-ը։

ՀՇՖ նախագահի խոսքով, դժվար է առաջիկայում ակնկալել այնպիսի հաջողություններ, որոնք եղել են նախկինում։

«Հավաստիացնում եմ, որ մենք անելու ենք ամեն ինչ, որպեսզի Հայաստանում շարունակի զարգանալ շախմատը։ Իհարկե, դժվար է ակնկալել այնպիսի հաջողություններ, որոնք մենք ունեցանք նախկինում։ Սա ընդամենը կարծիք է, և ես շատ ուրախ կլինեմ, որ այս կարծիքը չիրականանա, այլ հակառակը լինի։

Ես ուզում եմ, որ մեր երիտասարդները կարողանան համալրել ազգային հավաքականները, նաև անհատապես մեծ հաջողությունների հասնեն։ Այսպես սկեպտիկ եմ խոսում, որովհետև շախմատային կյանքում երկու մեծ կորուստ ենք ունեցել։ Մեծ կորուստ է Լևոն Արոնյանի տեղափոխվելն այլ հավաքական, թեև նա միշտ մնում է մեր հավաքականի բարեկամը։ Նա ինձ վստահեցրել է, որ Հայաստանում իրավիճակի փոփոխման պարագայում, վերադառնալու է մեր կազմ:

Մյուս կորուստը Արշակ Պետրոսյանի հեռանալն է։ Նա համարում է, որ այլևս չի կարող մեծ օժանդակություն տալ հավաքականին այնպես, ինչպետ նախկինում։ Այս տեսանկյունից մենք հավաքականի գլխավոր մարզիչի պաշտոնում տեսնում ենք Արման Փաշիկյանին» - ասել է Սերժ Սարգսյանը։

Հիշեցնենք՝ Սերժ Սարգսյանը վերընտրվել է Շախմատի ֆեդերացիայի նախագահի պաշտոնում։