«Չխմող սպային բռնությամբ ստիպել են օղի խմել». իրավապաշտպան

Այսօր լրագրողների հետ էին հանդիպել Տավուշի զորամասերից մեկում 2010 թ. հուլիսին զոհված սպա Արտակ Նազարյանի գործով իրավապաշտպան Ռուբեն Մարտիրոսյանն ու Արտակ Նազարյանի իրավահաջորդը՝ լրագրող Ծովինար Նազարյանը։ Վերջինս Արտակի քույրն է։

Ռուբեն Մարտիրոսյանն ասաց, որ Արտակ Նազարյանի գործով կեղծ փաստաթղթեր են դրվել շրջանառության մեջ։ «Ես արդեն 4 հայտարարություն եմ ուղարկել գլխավոր դատախազին, որոնք կա´մ պետք է մերժվեին, կա´մ պետք է քրեական գործ հարուցվեր դրանց առթիվ։ Իսկ դատախազն ընտրել է երրորդ ճանապարհ՝ ուղարկել է մեր հայտարարությունները դատարան, երբ դատարանն իրավասու չէ քրեական գործ հարուցել։ Մեղադրող Հարություն Հարությունյանը խոչընդոտում է դատարանում գործի օբյեկտիվ քննությանը»,- ասաց իրավապաշտպանը։

Նրա հայտարարությամբ՝ նաև մոտավորապես հայտնի են այն անձինք, ովքեր սպանել են Նազարյանին, բայց իրենք դեռևս չեն պատրաստվում բացահայտել այդ անունները՝ գործի շահերից ելնելով։ Մարտիրոսյանն աաց, որ դատաբժշկական եզրակացության համաձայն՝ սպանությունից 6-7 ժամ առաջ Նազարյանին ծեծել են, իսկ սպանությունից 1.5-2 ժամ առաջ բռնությամբ ստիպել են խմել։

«Առաջիկայում կլինեն սենսացիոն շատ բացահայտումներ, որոնք սահմռկեցուցիչ են: Նկատեմ նաեւ, որ վերջում է եղել կրակոցն ու սպանությունը, բայց այս երկու բռնությունների մասով էլ գործում որևէ տող չկա»,- եզրափակեց իրավապաշտպանը։