Սպայի մահվան գործով գլխավոր վկան ՌՈ-ում է մոտ 16 ամիս

Անցած հուլիսին զոհված սպա Արտակ Նազարյանի քույրը և իրավահաջորդը՝ Ծովինար Նազարյանը, այսօր լրագրողներին հայտնեցին, որ եղբոր գործով գլխավոր վկա Արման Մնացականյանն արդեն պետք է զորացրված լիներ, քանի որ նրա ծառայության ժամկետը լրացել է դեկտեմբերի 4-ին, բայց զինվորը դեռևս պահվում է Ռազմական ոստիկանությունում։ ՊՆ նախարար Սեյրան Օհանյանը հավատացրել էր զինվորի հարազատներին, որ նա կզորացրվի ճիշտ ժամանակին, բայց արդեն 12 օր անցել է, իսկ Արմանը դեռ տուն չի գնացել։

«Հիմքեր կան կարծելու, որ Արմանից, ով նախաքննության առանցքային վկաներից է, ցուցմունքներ են ձեռք բերել ապօրինի մեթոդներով՝ Տավուշի մարզի Բերդ քաղաքում 23 օր Ռազմական ոստիկանությունում պահելու ժամանակ»,- ասաց Ծովինար Նազարյանը՝ կարծիք հայտնելով, որ դրանով է պայմանավորված վկայի ցուցմունքներում հաճախակի հակասությունների առկայությունը։

Նազարյանը նաև ասաց, որ Սեյրան Օհանյանը պարտավոր է զսպող դեր կատարել ՊՆ ենթակայության տակ գտնվող կառույցների, այդ թվում՝ Ռազմական ոստիկանության համար, որպեսզի նրանք սահմանափակեն իրենց կամայականությունները և ճնշում չգործադրեն վկաների վրա։

«Նախարարը նաև պետք  է կարգադրի, որ ՊՆ քննչական ծառայությունը նոր քրեական գործ սկսի Արտակի մահվան հանգամանքները պարզելու համար և կատարի անաչառ ու բազմակողմանի քննություն»,- ասաց Ծովինար Նազարյանը։