Daily Mail-ը նշել է շոգին զովանալու մի քանի արտասովոր մեթոդներ

Daily Mail-ի բրիտանական հրատարակությունն ուսումնասիրել է մի շարք հետազոտություններ և հոդված է հրապարակել շոգին օրգանիզմը զովացնելու անսովոր մեթոդների մասին:

Այսպիսով, հոդվածում զովանալու միջոցներից է տաք թեյի օգտագործումը։ Համաձայն 2012 թվականին Օտտավայի համալսարանի հետազոտողների ուսումնասիրության՝ տաք ըմպելիքներ խմելը կարող է զովացնել ձեզ, բայց միայն չոր եղանակին: Հետազոտության հեղինակներից մեկն ասել է, որ երբ մարդ տաք ըմպելիք է խմում, նա ավելի շատ է քրտնում, հետևաբար ավելի արագ է սառչում։ Միևնույն ժամանակ, բարձր խոնավության դեպքում քրտինքը լավ չի գոլորշիանում մաշկի մակերևույթից, ապա այդ դեպքում ավելի լավ է խմել զով ըմպելիքներ, նշել է փորձագետը։

Յեյլի համալսարանի մասնագետների կարծիքով՝ կծու մթերքների օգտագործումը կարող է նաև թեթևություն պարգևել շոգին: Նրանց հետազոտության համաձայն՝ կծու սնունդը գրգռում է մաշկի ընկալիչները, որոնք սովորաբար արձագանքում են ջերմությանը և ազդանշաններ ուղարկում կենտրոնական նյարդային համակարգին, որն ի պատասխան` «միացնում» է անոթների լայնացումը և ավելանում է քրտնարտադրությունը, նշվում է հոդվածում։

Գիտնականները հովանալու ևս մեկ արտասովոր միջոց «սովորել են» կենգուրուներից և կապիկներից. շոգ եղանակին այս կենդանիները լիզում են դաստակները, գրում է Daily Mail-ը։ Այդ մասերում զգացվում է զարկերակի բաբախյունը, և դաստակները լիզելով կամ սրբելով՝ կարելի է խաբել օրգանիզմին՝ թուքն օգտագործելով իբրև որպես քրտինք, և այդպիսով կարելի է դանդաղեցնել արյան հոսքը՝ կանխելով օրգանիզմի գերտաքացումը։

Մասնագետները նաև խորհուրդ են տալիս հնարավորության դեպքում նվազեցնել կենցաղային տեխնիկայի աշխատանքը և ուշադրություն դարձնել փոքր սարքերին ու գաջեթներին, որոնք մեծ ջերմություն են առաջացնում։ Հետազոտողները նաև խորհուրդ են տվել ճիշտ բացել տան բոլոր պատուհանները, փորձել արագ շնչառական տեխնիկա և ընդմիջումներ անել աշխատանքի ժամանակ: