Պապիկյանը թող ձենը կտրի, հաթաթա չտա ու ինտրիգով չզբաղվի. ինքը ոչ թե ՔՊ-ի պաշտպանն է, այլ ՀՀ ՊՆ-ն

«Սովորաբար մենք Պաշտպանության նախարարությանը մեր պայքարի ընթացքում թիրախ չենք դարձրել, քանի որ այն Պաշտպանության նախարարություն է». Այս մասին այսօր՝ հուլիսի 11-ին, լրագրողների հետ հանդիպման ժամանակ հայտարարեց ԱԺ «Հայաստան» խմբակցության պատգամավոր, «Դիմադրության» շարժման համակարգող Իշխան Սաղաթելյանը՝ արդձագանքելով պաշտպանության նախարար Սուրեն Պապիկյանի խորհրդարանում հնչեցրած այն մտքին, թե ընդդիմությունը խոսում է Արցախի փրկությունից, բայց երկիրը տանում է անորոշության։

«Սուրեն Պապիկյանը պետք է հասկանա, որ ինքը ՔՊ-ի պաշտպանը չէ ու չզբաղվի ՔՊ-ի պաշտպանությամբ, այլ զբաղվի ՀՀ սահմանների պաշտպանությամբ»,- ասաց Իշխան Սաղաթելյանը՝ հավելելով, որ Սուրեն Պապիկյանը պետք  է կողմնորոշվի՝ շարունակում է զբաղվել ՔՊ-ի տարածքային գրասենյակների ստեղծմա՞մբ, թե՞ մեր երկրի պաշտպանությամբ։

«Եվ առհասարակ, լավ կանի ձենը կտրի ու գնա զբաղվի նրանով, ինչով պետք է զբաղվի՝ ՀՀ սահմանների պաշտպանությամբ, այլ ոչ թե ընդդիմությանը հաթաթա տա, հոխորտա կամ մատ թափ տա»: Նման բաներ ասելուց թող չթվա իրենք անձեռնմխելի են։ Թող ձենը կտրի ու գնա զբաղվի ՀՀ սահմանների պաշտպանությամբ»,- ասաց Իշխան Սաղաթելյանը։

Հիշեցնենք, որ Սուրեն Պապիկյանը  հայտարարել էր, թե ընդդիմությունը երկիր չի փրկում, փորձում է երկիրը տանել դեպի անորոշություն: