Հունաստանը կասկած է հայտնել, որ Թուրքիան ցանկանում է գրավել Կրետե կղզին

Հունաստանի վարչապետ Կիրիակոս Միցոտակիսը Twitter-ում Թուրքիայի նախագահ Ռեջեփ Թայիփ Էրդողանին կոչ է արել մեկնաբանել Թուրքիայի «Ազգայնական շարժում» կուսակցության (MHP) առաջնորդ Դևլեթ Բահչելիի լուսանկարը քարտեզով, որտեղ Էգեյան ծովի մի շարք հունական կղզիներ նշված են՝ որպես թուրքական։

«Ուշադիր նայեք այս քարտեզին։ Կրետե, Հռոդոս, Լեսբոս, Քիոս, Սամոս կղզիները նշված են՝ որպես թուրքական: Ծայրահեղականներն այս մասին տենդագին երազո՞ւմ են, թե՞ Թուրքիայի պաշտոնական քաղաքականությունն է։ Հերթական սադրա՞նք է, թե՞ իրական նպատակ։ Նախագահ Էրդողանը պետք է հստակ արտահայտի իր դիրքորոշումը կոալիցիոն իր կրտսեր գործընկերոջ վերջին չարաճճիությունների վերաբերյալ»,- գրել է Հունաստանի վարչապետը։

Հուլիսի 9-ին Բահչելին լուսանկարվել է Էգեյան ծովի քարտեզով, որի վրա հունական կղզիները՝ ներառյալ Կրետեն, նշվում են՝ որպես Թուրքիայի տարածքի մաս։

1669 թվականին Կրետեն, որտեղ նախկինում Վենետիկի անդրծովյան տիրապետությունն էր, գրավվեց Օսմանյան կայսրության կողմից: 1897 թվականի հույն-թուրքական պատերազմից հետո կղզին ստացավ ինքնավարություն, իսկ 1908 թվականին Կրետեն դե ֆակտո դարձավ հունական թագավորության մաս։ Պաշտոնապես դա տեղի ունեցավ 1913 թվականին։

Ավելի վաղ Հունաստանի դիվանագիտական ​​աղբյուրները ագրեսիվ գործողություն էին անվանել Էգեյան ծովում գտնվող կղզիներով Բահչելիի քարտեզներում ցուցադրումը։