«Օբյեկտներ», արժեթղթեր, ՍՊԸ-ներ. ՔՊ-ականների բիզնես հաջողությունները հեղափոխությունից հետո

2018 թ. իշխանափոխությունից կարճ ժամանակ անց լրատվամիջոցներում սկսեցին տեղեկություններ հրապարակվել գործող իշխանությունների հետ առնչություն ունեցող անձանց բիզնես «հաջողությունների» մասին: Դրանք գնալով ավելի մեծ թափ ստացան: Ուշագրավ է, որ Վարչապետ Նիկոլ Փաշինյանն ուղիղ եթերներից մեկում հպարտորեն հայտարարում էր, որ հետհեղափոխական Հայաստանի պաշտոնյաների մեջ չկան բիզնեսմեններ և հենց այստեղ է որակական տարբերությունը նախկին իշխանություններից: Վարչապետի հայտարարությունը, մեղմ ասած, տարակուսանք է առաջացնում այն պարզ պատճառով, որ հենց վարչապետի թիմակիցներն իրենց իսկ շուրթերով հայտարարում են, որ իրենք գործարարներ են և չեն էլ փորձում թաքցնել, որ հաճախ սեփական բիզնես շահերի լոբբինգով են զբաղված:

Դիցուք՝ «Աղբահանություն եւ սանիտարական մաքրում» համայնքային հիմնարկի տնօրեն Հովհաննես Մանուկյանը նախորդ տարի ռեստորան է բացել: «Ժողովուրդ» օրաթերթի տեղեկություններով՝ Երեւանի Գյուրջյան փողոցում գտնվող «Հին թաղեր» պանդոկը Մանուկյանը բացել է վարչական շրջանի ղեկավար եղած ժամանակ:Նա, նշենք, Նորք-Մարաշի, այնուհետեւ Նոր Նորքի թաղապետի պաշտոններն է զբաղեցրել, ինչի ընթացքում էլ՝ 2021-ին, հասցրել է բացել ու շահագործել վերոնշյալ պանդոկը: Միևնույն ժամանակ ինքը Մանուկյանը պնդում է, որ պանդոկը իր ընտանիքինն է, այո, սակայն իր հետ կապ չունի: Միևնույն ժամանակ պետք է հասկանալ, որ ընտանիքն էլ, ինչպես ասում են, հարմար պահ է գտել պանդոկ բացելու համար, մի ժամանակահատված, երբ Մանուկյանը բարձր պաշտոնի էր:

Լոռու նախկին մարզպետ Անդրեյ Ղուկասյանը պաշտոնը զբաղեցնելու անմիջապես հետո լծվեց հետաքննչական աշխատանքների:  Մարզպետի հետաքննչական աշխատանքները լոռեցիների շրջանում միամիտ խոսակցությունների առիթ են դարձել՝ «կարո՞ղ է մարզպետը հայտնվի իր փորած փոսում»։ Բանն այն է, որ քաղաքի կենտրոնում Ղուկասյանը մինչ հեղափոխությունը հողատարածք էր գնել նախկին քաղաքապետ Սամվել Դարբինյանի եղբորորդուց՝ հանրահայտ Քաղցրիկից՝ Արման Դարբինյանից, ու կարող է պարզվել, որ այդ հողատարածքն էլ է ապօրինի ու Դարբինյանների գերդաստանի ձեռքում է հայտնվել «իշխանությունների կատարած գործարքների» արդյունքում։ Մինչդեռ, հենց այդ հողատարածքի վրա հեղափոխությունից հետո մարզպետը սկսել է մեծ ատամնաբուժարան կառուցել։

Հավանաբար քչերը գիտեն, որ իշխանական պատգամավոր, Նիկոլ Փաշինյանի քավոր Վահե Ղալումյանն Իջեւանում` հեղափոխությունից հետո, ռեստորան է կառուցել: Այն կոչվում է «Ոսկե ձկնիկ»: Իջեւանում գտնվող երկհարկանի ռեստորանը, որն ունի նաեւ բացօթյա տաղավարներ, 2020 թվականից չէր գործում` փակ էր, սակայն ամիսներ առաջ այն վերաբացվել է: 

Շիրակի մարզպետ Նազելի Բաղդասարյանը «Սթայլ Մեդիա» ՍՊԸ-ի սեփականատերն է: 

Հեղափոխությունից հետո շատ է շրջանառվում ՊԵԿ փոխնախագահ Շուշանիկ Ներսիսյանի և նախկին փոխնախագահ Արա Գաբրիելյանի «համատեղ բիզնեսի» մասին լուրը։ Ըստ այդ տեղեկատվության, «Ուրբան» մաքսային տերմինալը և Արարատյան մաքսատանը գործող 3-րդ ձևակերպման բաժինը փակվել են, և դրանց գործառույթներն իրականացնելու է հեղափոխությունից հետո հիմնադրված «Յունիսերվ» ՍՊԸ-ն, որի հետևում էլ կանգնած են Արա Գաբրիելյանն ու Շուշանիկ Ներսիսյանը: Ըստ էության, այս ընկերությունը ստեղծվեց այն բանից հետո, երբ քրեական գործ հարուցելու արդյունքում շուկայից դուրս մղվեց «Նորֆոլք Քոնսալթինգ»-ը:

Պատգամավոր Արսեն Թորոսյանի հայտարարագրից պարզ է դառնում, որ վերջինս «Bank Austria»-ում ավելի քան 20 հազար եվրոյի չափով ձեռքբերված արժեթղթեր ունի, իսկ տարվա սկզբին բանկում 32 հազար դոլար ավանդը տարվա վերջին զրոյացել է:

Արարատի նախկին մարզպետ Գարիկ Սարգսյանը, ըստ մամուլի հրապարակումների, հաջողության իրենով է արել Արաքսի ափին ավազի արդյունահանման բիզնեսը; Տվյալ բիզնեսը այնպիսին է, որով հնարավոր է զբաղվել միայն վարչական լծակների առկայության դեպքում, ինչը այսօր չունեն Աբրահամյանները որոնց ժամանակին էլ այն պատկանում էր, բայց ունի Սարգսյանը:

Hayeli.am-ի տեղեկություններով՝ Երևան-Սևան մայրուղու վրա վերջերս շինարարական նյութերի և կոնստրուկցիաների արտադրություն է բացվել, որի իրական տերը ՀՔԾ պետ Սասուն Խաչատրյանն է, թեպետ փաստաթղթերով օբյեկտն այլ անձի է պատկանում։ Սասուն Խաչատրյանը ոչ հերքել է, ոչ էլ հաստատել տվյալ տեղեկությունը:

2018թ. հունիսի 7-ին վարչապետ Նիկոլ Փաշինյանը կառավարության գործունեության համար որպես ուղենշային հայեցակարգային հիմնախնդիր հռչակել էր  քաղաքականության և բիզնեսի գործնական տարանջատումը: Ոչ միայն չտարանջատվեց, այլ մի բան էլ՝ իր թափով չի զիջում նախկին իշխանության ներկայացուցիչների բիզնես նկրտումներին: Այս մարդիկ իշխանության են եկել ժողովրդին բարեկեցություն, արդարություն բերելու, «նախկինների» արատավոր բարքերը վերացնելու և նման այլ խոստումներով: Բայց ստացվում է՝ իրականում իշխանությունն իրենց է բերել փող, անձնական և բիզնես հաջողություններ ու... մեծ երջանկություն։ Հարց է՝ նրանք կունենայի՞ն այս ամենը, եթե չլինեին իշխանավոր, կամ իրենց հարազատը, ընկերը չլիներ բարձրաստիճան պաշտոնյա: