ՔՊ-ական մարզպետի մեկամյա «արկածները» զբաղեցրած պաշտոնում

Մի քանի օրից կլրանա Շիրակի մարզպետ Նազելի Բաղդասարյանի ղեկավարման մեկ տարին: Հպանցիկ հայացքը մարզպետարանի կայքին բավարար է հասկանալու համար, թե որքան արդյունավետ է եղել ՔՊ-ական մարզպետի կառավարման այս մեկ տարին մարզի և շիրակցիների համար:

Ընդհանուր առմամբ, եթե դիտարկում ենք մարզպետի ակտիվությունը, ապա այդ ակտիվությունը հատկապես քաղաքացիների հետ հանդիպումների մասով, ապա պետք է փաստենք, որ այս առումով ավելի ակտիվ են փոխմարզպետները, ոչ թե ինքը՝ մարզպետ Բաղդասարյանը:

Ինչ վերաբերվում է գործերին, ապա այստեղ թվերը խոսում են իրենք իրենց մասին: Դիցուք՝ Շիրակի մարզը շարունակում է մնալ Հայաստանի ամենաաղքատ մարզը, այստեղ աղքատությունը կազմում է շուրջ  60 տոկոս: Ի՞նչ են արել մարզի իշխանությունները, որքան նոր աշխատատեղ են հիմնել, որքան ներդրում են բերել մարզ՝ այս պատկերը շտկելու համար հայտնի չէ: Այս ֆոնին ուշագրավ է, որ  ամենաշատ աշխատուժը առկա է հենց Շիրակի մարզում՝ 15 746 մարդ: 

Չի լուծվել նաև աղետի գոտու վերականգնման հարցը: Իհարկե, դժվար էր սպասել, որ մեկ տարվա մեջ պետք է իրականացվի այն ծրագիրը, որը իշխանությունները չորս տարի շարունակ ի վիճակի չեն իրագործել, սակայն սպասելի էր որոշակի դրական շարժ, որը, ցավոք սրտի, դեռևս չկա: Դոմիկներում ապրող տասնյակ քաղաքացիներ շարունակվում են անտեսված մնալ իշխանությունների կողմից:

Փոխարենը՝ մարզպետ Բաղդասարյանը հասցրել է այս մեկ տարվա մեջ հայտնվել մի շարք պիկանտ պատմությունների կիզակետում: Սկզբում վերջինիս ուսանող հարսը աշխատանք էր ստացել Գյումրիի համայնքապետարանում, ապա սկանդալով պաշտոնից հեռացել էր, ինչպես և իր ամուսինը՝ Բաղդասարյանի եղբայրը, ով հրաժարվել էր Գյումրու ավագանու մանդատից և բավական կոշտ գրառումներով էր հանդես գալիս արդեն նախկին փոխքաղապքաետ Դավիթ Առուշանյանի հասցեին: Մամուլը գրում էր, որ Բաղդասարյանի եղբայրը ինքը ուներ քաղաքապետ կամ առնվազն փոխքաղաքապետ դառնալու ամբիցիաներ, որոնք, սակայն, չբավարարվեցին:

Մարզում որևէ խոշոր ծրագիր չիրականացրած Բաղդասարյանի անունը հաճախ էր հոլովվում նաև ներթիմային ռազբորկաների համատեքստում:

Մամուլը նաև գրել էր, որ Բաղդասարյանը դեմ է եղել, որպեսզի իր թիմակից ՔՊ-ականները ավելացնեն զբաղեցրած պաշտոնների թիվը Գյումրիի քաղաքապետարանում: Սակայն հարց է առաջանում, թե ինչու պետք է առաջին հայացքից կարկառուն ՔՊ-ական երևացող Բաղդասարյանը նման քայլի գնար: Ըստ երևույթին՝ մարզպետը չի ցանկանում, որ այդ բաղձալի պաշտոնը զբաղեցնի ոչ յուրային ՔՊ-ականը, քանի որ մամուլը բազմիցս էր անդրադարձել Գյումրիի քաղաքապետարանում Բաղդասարյանի կադրային նախապատվություններին: 

Դրան հաջորդեց հրապարակումը, որ Գյումրիում կայացած ընտրություններից հետո ՔՊ շտաբում թեժ է եղել, իսկ հիմնական կռվարարներն էին՝ Սարուխանյանը, Հարությունյանը և Բաղդասարյանը: 

Ինչպես տեսնում ենք՝ ՔՊ-ական մարզպետի կառավարման մեկ տարին բավական բուռն է անցել, սակայն, մեղմ ասած, ոչ այնքան արդյունավետ, որքան նրանից դա ակնկալում էին մարզի բնակիչները...