Իրականությունից կտրվածները. ՔՊ-ականների միֆերը սփյուռքի մասին

Սփյուռքահայերի 74 տոկոսը պատրաստ է Հայաստանում ներդրումներ անել։ Այս մասին երեկ  Երևանում մեկնարկած «Այլընտրանքային ներդրումները Հայաստանում» երկօրյա միջազգային համաժողովի բացմանն հայտարարել էր ՀՀ էկոնոմիկայի նախարար Վահան Քերոբյանը։ Թե որտեղից Քերոբյանին այդպիսի վիճակագրություն, ինչու 74 տոկոս, այլ ոչ թե ասենք ՝ 75 կամ  48, դժվար է ասել:

Սակայն, սա առաջին դեպքը չէ, երբ ՔՊ-ականները փորձում են տարբեր թվեր դաշտ նետելով սփյուռքի հետ համագործակցության բուռն իմիտացիա ստեղծել: 2018-ին այն ժամանակվա սփյուռքի նախարար Մխիթար Հայրապետյանը հայտարարում էր, որ ավելի քան 100 ընտանիք է դիմել իրեն, անգամ տներն են վաճառում, որպեսզի վերադառնան Հայաստան: Վերադարձան, թե ոչ՝ հանրությունը այդպես էլ չիմացավ: Սակայն, եթե վերադառնային, ապա դրա վրա էլ իշխանությունները, անշուտ, կփիառվեին: Չեն փիառվել, ինչը արդեն իսկ թույլ է տալիս որոշ ենթադրություններ անել:

Սփյուռքի գործերի գլխավոր հանձնակատար Զարեհ Սինանյանը թեև փոքր-ինչ ավելի համեստ է գտնվել, նշելով, որ հայրենադարձության հնարավորություններ այս պահին չունենք, սակայն նա էլ մշտապես փորձում է տպավորություն ստեղծել, որ սփյուռքը տենչում է համագործակվել ՀՀ իշխանությունների հետ, ավելին` նա պնդում էր, որ ներգաղթի հրաշքը իրենք պետք է առաջ բերեն:

Բերեցին թե ոչ` կարելի է դատել վերջերս Երևանում կայացած համաժողովի մասնակիցների թվից: Սփյուռքի կառույցների մի ստվար հատված պարզապես մերժել էր մասնակցել Սինանյանի կազմակերպած համահայկական միջոցառմանը, հետևաբար հարց է առաջանում, թե որքանով էր այն ընդհանրապես համահայկական:

Սակայն, ինչպես երևում է, իրականության հետ առերեսվելը ՀՀ իշխանությունների մոտ այդքան էլ լավ չի ստացվում, և նրանք նախընտրում են հանրությանը գեղեցիկ միֆեր հրամցնել` փորձելով ապացուցել, որ ՀՀ-սփյուռք հարաբերություններում չկան որևէ խնդիրներ: