Լազերային թերապիան բարելավում է կարճաժամկետ հիշողությունը 25%-ով. Science Advances

Գիտություն և Մշակույթ 3 Դեկտեմբեր, 2022 11:37

Լազերային ճառագայթային թերապիան արդյունավետ է կարճաժամկետ հիշողությունը բարելավելու համար, պարզել են Մեծ Բրիտանիայի Բիրմինգհեմի համալսարանի և Չինաստանի Պեկինի նորմալ համալսարանի գիտնականները: Հետազոտողների աշխատանքը հրապարակվել է Science Advances ամսագրում:

Գիտնականներն օգտագործել են տրանսկրանիալ ֆոտոբիոմոդուլյացիա: Սա լուսային թերապիայի ձև է, որն օգտագործում է մոնոխրոմատիկ տեսանելի և ինֆրակարմիր լույս լազերներից, որոնք տեղադրված են գլխի վրա՝ լույսն ուղղակիորեն ուղեղի թիրախավորված տարածքների վրա արձակելու համար:

Այս հետազոտության ընթացքում գիտնականները թիրախավորել են աջ նախաճակատային կեղևը, որը կարևոր դեր է խաղում կարճաժամկետ հիշողության ձևավորման գործում։ Նման ոչ ինվազիվ թերապիան կարող է բարելավել մարդկանց կարճաժամկետ հիշողությունը 25%-ով ընդամենը մի քանի րոպե բուժումից հետո:

«Ուշադրության դեֆիցիտի հիպերակտիվության խանգարման կամ ուշադրության հետ կապված այլ խանգարումներ ունեցող մարդիկ կարող են օգտվել այս տեսակի բուժումից: Այն անվտանգ է, արագ և առանց կողմնակի ազդեցությունների»,- նշել են գիտնականները։

Փորձին մասնակցել է կարճաժամկետ հիշողության հետ կապված խնդիրներ ունեցող 90 մարդ։ 12 րոպե տևողությամբ պրոցեդուրայից հետո առաջին խմբի մասնակիցներին խնդրել են վերհիշել պրոցեդուրայից առաջ էկրանին ցուցադրված իրերի հավաքածուն: Նրանք կարողացել են նշել 4-5 կետ, ինչը 25%-ով ավելին է, քան վերահսկիչ խմբում:

Հետազոտողները դեռ հստակ չգիտեն, թե ինչու է բուժումը դրական ազդեցություն ունենում օպերատիվ հիշողության վրա, և որքան երկար կտևի այդ ազդեցությունը։ Այս ասպեկտները բացահայտելու համար նախատեսվում են հետագա ուսումնասիրություններ: