Ռուսաստանում անոմալ սառնամանիք է, Մոսկվայում 21-րդ դարի ամենացուրտ օրերն են

ՌԴ Օրենբուրգի մարզում, Ուդմուրտիայում և Բաշկիրիայում անոմալ սառնամանիքներ են դիտվում։ Օդերևութաբաններն առաջիկա օրերին ակնկալում են ջերմաստիճանի անկում մինչև -42°C։

«Արևմտյան Սիբիրի հարավում դրամատիկ իրադարձություններ են սպասվում. կտրուկ սառեցում է լինելու։ Հունվարի 8-9-ը Օմսկի մարզում կգրանցվի -31-ից մինչև -32°C, իսկ հետո  -33-ից մինչև -35°C»,- ՏԱՍՍ-ին ասել է օթերևութաբան Վիլֆանդը։ Նրա խոսքով, շատ ցուրտ եղանակ է սպասվում (մինչեւ -43°C) նաև Ուրալում։

Ուդմուրտիայում, որտեղ հունվարի 9-ին սպասվում է ջերմաստիճանի անկում մինչև -36°C, դպրոցներն ու լրացուցիչ ուսումնական հաստատությունները կանցնեն հեռավար ուսուցման: Իժևսկում չեղարկվել են նաև ցերեկային և երեկոյան ամանորյա տոնական միջոցառումները բաց տարածքներում։

Չելյաբինսկի մարզում՝ Տագանայ ազգային պարկում, անցած գիշեր գրանցվել է -43°C ցրտահարություն։ Հունվարի 8-ին ցրտի պատճառով չեղարկվել են միջքաղաքային ավտոբուսների մի քանի երթուղիներ։

Հունվարի 6-ին Մոսկվայում անոմալ սառնամանիքներ են սկսվել։ Այդ օրը մայրաքաղաքում օդի ջերմաստիճանը իջել է -20°C-ից։ Օդերևութաբանները ենթադրում են, որ Մոսկվայում հունվարի 6-ից 10-ն ընկած հնգօրյակը  կլինեն 21-րդ դարի ամենացուրտ օրերը։