Կրեմլը բացահայտել է Պուտինի և Էրդողանի հեռախոսազրույցի բովանդակությունը

Կրեմլի մամուլի ծառայությունը բացահայտել է ՌԴ նախագահ Վլադիմիր Պուտինի և Թուրքիայի նախագահ Ռեջեփ Թայիփ Էրդողանի հեռախոսազրույցի բովանդակությունը։ Այս մասին հայտնում է Lenta.ru-ն։

Ինչպես նշել են Կրեմլում, Էրդողանը շնորհակալություն է հայտնել Պուտինին՝ Թուրքիայում երկրաշարժերի հետեւանքները վերացնելու հարցում ցուցաբերած օգնության համար։ Իր հերթին, Ռուսաստանի ղեկավարը հաստատել է իր պատրաստակամությունը՝ աջակցելու տուժած շրջանների վերականգնմանը։

Բացի այդ, առաջնորդները քննարկել են էներգետիկ ոլորտում համագործակցությունը, մասնավորապես, ռուսական էներգակիրների մատակարարման և  «Ակկույու» ատոմակայանի կառուցման հետ կապված հարցեր։ Նախագահները մտքեր են փոխանակել նաև Ուկրաինայում տիրող իրավիճակի շուրջ։ Խոսքը գնում է ուկրաինական հացահատիկի արտահանման, ինչպես նաև ռուսական գյուղմթերքի և պարարտանյութերի արտահանման մասին պայմանավորվածությունների իրականացման մասին։