ԱՄՆ-ն Սի Ծինփինին կոչ է արել կապ հաստատել Զելենսկու հետ

ԱՄՆ ազգային անվտանգության հարցերով խորհրդական Ջեյք Սալիվանը ճեպազրույցի ժամանակ ասել է, որ ԱՄՆ-ը Չինաստանի նախագահ Սի Ծինփինին կոչ է արել շփումներ սկսել Ուկրաինայի նախագահ Վլադիմիր Զելենսկու հետ, որպեսզի Պեկինը լսի Կիևի կարծիքը Ուկրաինայի շուրջ ստեղծված իրավիճակի վերաբերյալ։ Այս մասին հայտնում է ՏԱՍՍ-ը։

«<…> Մենք հորդորել ենք նախագահ Սիին (Չինաստանի նախագահ Սի Ծինփին - խմբ․) կապ հաստատել նախագահ Զելենսկու հետ, քանի որ կարծում ենք, որ Չինաստանը և նախագահ Սին անձամբ պետք է լսեն Ուկրաինայից նրա կարծիքը [ճգնաժամի վերաբերյալ], և ոչ թե միայն Ռուսաստանից»,- ասել է նա։

Ավելի վաղ The Wall Street Journal-ը, վկայակոչելով աղբյուրներին, գրել էր, որ Սի Ծինփինը ծրագրում է առցանց հանդիպում անցկացնել Զելենսկու հետ։ Ինչպես նշում է հրատարակությունը, համապատասխան զրույցը կարող է տեղի ունենալ ՌԴ առաջնորդ Վլադիմիր Պուտինի հետ բանակցություններից հետո, որոնք կարող են տեղի ունենալ հաջորդ շաբաթ Մոսկվայում։