ԱՀԿ ղեկավարը վստահություն է հայտնել` 2023 թվականին COVID-19 համաճարակը կավարտվի

Առողջապահության համաշխարհային կազմակերպության (ԱՀԿ) գլխավոր տնօրեն Թեդրոս Գեբրեյեսուսը վստահ է, որ 2023 թվականին COVID-19 համաճարակը կավարտվի, և այս հիվանդության պատճառով միջազգային արտակարգ ռեժիմը կվերացվի։ Համապատասխան հայտարարությունը նա արել է, երբ պարգևատրվել է Թոմաս Ֆրենսիս կրտսերի մեդալով՝ առողջապահության ոլորտում ունեցած ավանդի համար։ Հայտարարության տեքստը երեքշաբթի գիշերը տարածել է ԱՀԿ մամուլի ծառայությունը։

«Վստահ եմ, որ այս տարվա ինչ-որ պահի մենք կկարողանանք ասել, որ COVID-19-ն ավարտվել է՝ որպես միջազգային մտահոգության հանրային առողջության արտակարգ իրավիճակ և որպես համաճարակ», - ասել է Գեբրեյեսուսը:

Նա հիշեցրել է, որ մարտի 11-ին լրացավ ուղիղ երեք տարին, ինչ «ԱՀԿ-ն առաջին անգամ հայտարարեց, որ COVID-19-ի համաշխարհային բռնկումը կարելի է բնութագրել՝ որպես համաճարակ»։ Դա «կարևոր պահ էր, որը գրավեց համաշխարհային լրատվամիջոցների ուշադրությունը»: Այնուամենայնիվ, ԱՀԿ-ի տեսանկյունից, ըստ նրա, շատ ավելի կարևոր էր այն պահը, երբ վեց շաբաթ առաջ՝ 2020 թվականի հունվարի 30-ին, կազմակերպությունը կորոնավիրուսի տարածումը հայտարարեց «միջազգային մտահոգության հանրային առողջության արտակարգ իրավիճակ»։

«Այժմ մենք, անշուշտ, շատ ավելի լավ վիճակում ենք, քան երբևէ համաճարակի ժամանակ», - ասել է գործադիր տնօրենը: Նա ուշադրություն է հրավիրել այն փաստի վրա, որ «առաջին անգամ գրանցված մահերի շաբաթական թիվն այժմ ավելի քիչ է», քան այն ժամանակ, երբ ԱՀԿ-ն առաջին անգամ օգտագործեց «համաճարակ» բառը՝ նկատի ունենալով SARS-CoV-2-ի տարածումը երեք տարի առաջ։ «Բարելավումը զգալի է»,- հավելել է Գեբրեյեսուսը։