Բեռլինում Ալիևը Լաչինի միջանքում սահմանային անցակետ ու «Զանգեզուրի միջանցք» է պահանջել

Բեռլինում Գերմանիայի նախագահ Ֆրանկ-Վալտեր Շտայնմայերի հետ հանդիպման ժամանակ Ադրբեջանի նախագահ Իլհամ Ալիևը պնդել է, թե «անհրաժեշտ է Ադրբեջանի սահմանային անցակետ ստեղծել Լաչինի ճանապարհի վերջնակետում՝ հայ-ադրբեջանական սահմանին»։

Նա նաև հայկական կողմից այսպես կոչված՝ «Զանգեզուրի միջանցք» է պահանջել՝  հայտարարելով, թե իբր «Հայաստանը խուսափում է եռակողմ հայտարարությամբ ստանձնած պարտավորությունների կատարումից»։

Ավելի վաղ ՀՀ վարչապետ Նիկոլ Փաշինյանը հայտարարել էր, որ Ադրբեջանը փորձում է խաղաղության հաստատման և հարաբերությունների հաստատման հնարավոր պայմանագրի միջոցով ՀՀ-ին տարածքային պահանջներ կամ նկրտումներ ձևակերպել, ինչը հասկանալիորեն և բնականաբար կարմիր գիծ է ՀՀ-ի համար:

Փաշինյանը նաև հիշեցրել էր, որ Բաքուն չի կատարում 2020 թ. նոյեմբերի 9-ի եռակողմ հայտարարությամբ ստանձնած պարտավորությունները։

«Մենք այսօր ունենք գրված, ստորագրված, հրապարակված փաստաթուղթ, որը չի կատարվում՝ 2020 թ. նոյեմբերի 9-ի եռակողմ հայտարարությունը, ըստ որի՝ Լաչինի միջանցքը որևէ կերպ փակ չպետք է լիներ, իսկ Լաչինի միջանցքը փակ է»,- նշել էր նա: 

Հիշեցնենք, որ Ալիևն ավելի վաղ խոստովանել էր, որ եռակողմ հայտարարության մեջ խոսք չկա այսպես կոչված՝ «Զանգեզուրի միջանցքի» մասին։