ԱՄՆ վարչակազմը TikTok-ը համարում է ազգային անվտանգության սպառնալիք

ԱՄՆ վարչակազմը չինական TikTok սոցիալական ցանցը դիտարկում է որպես ազգային անվտանգության սպառնալիք, որին պետք է «այսպես թե այնպես վերջ տալ», հինգշաբթի ասել է պետքարտուղար Էնթոնի Բլինքենը։ Այս մասին հաղորդում է ՌԻԱ Նովոստին։

«Ես կարծում եմ, որ այո, այդպես է: [Այս սպառնալիքին] պետք է վերջ տալ այսպես թե այնպես, և կան տարբեր մեթոդներ դա անելու համար», - ասել է Բլինքենը ԱՄՆ Ներկայացուցիչների պալատի արտաքին հարաբերությունների հանձնաժողովում լսումների ժամանակ: Այսպես, ամերիկյան դիվանագիտության ղեկավարը պատասխանել է կոնգրեսականներից մեկի այն հարցին, թե արդյոք վարչակազմը TikTok-ը համարում է սպառնալիք ԱՄՆ ազգային անվտանգության համար, և եթե այո, ապա արդյոք Վաշինգտոնն անհրաժեշտ է համարում վերջ տալ դրան։

TikTok-ի հետ կապված խնդիրները սկսվել են Դոնալդ Թրամփի վարչակազմի օրոք, ով սպառնում էր արգելել սոցիալական ցանցը ԱՄՆ-ում։ Ջո Բայդենի վարչակազմը նույնպես քննադատում է TikTok-ին և, ինչպես ավելի վաղ հայտնել էր The Wall Street Journal-ը, հղում անելով աղբյուրներին, պահանջում է TikTok-ի սեփականատերերից՝ ByteDance-ից, վաճառել իրենց մասնաբաժինը, այլապես հավելվածը կարող է արգելված դառնալ: