Սի Ծինփինը Պուտինին հասկացրել է, որ միջուկային զենքի օգտագործումն անընդունելի է․ Բորել

Մոսկվա կատարած պաշտոնական այցի ժամանակ Սի Ծինփինը Վլադիմիր Պուտինին հասկացրել է, որ միջուկային զենքի օգտագործումն անընդունելի է։ Եվրոպայում կարծում են, որ Չինաստանի առաջնորդի ուղեւորությունը «աշխարհն ավելի ապահով է դարձրել»։

Այս մասին Financial Times-ի լրագրողներին ասել է եվրոպական դիվանագիտության ղեկավար Ժոզեպ Բորելը։

Նրա խոսքով՝ Չինաստանի առաջնորդի ուղեւորությունը «աշխարհն ավելի ապահով դարձրեց՝ նվազեցնելով Պուտինի միջուկային զենք օգտագործելու հավանականությունը»։ Նա հավելել է, որ Սի Ծինփինը Պուտինին դա հասկացրել է Մոսկվա կատարած այցի ժամանակ, որտեղ ներկայացրել է իր «խաղաղության ծրագիրը», որտեղ մասնավորապես նշվում է միջուկային զենքի կիրառման անհնարինությունը։

Ընդ որում, եվրոպական դիվանագիտության ղեկավարը նշել է, որ ապացույցներ չի տեսնում, որ Չինաստանը մտադիր է զենք մատակարարել Ռուսաստանին։