Պուտինը մեղադրել է Արևմուտքին Սի Ծինփինի հետ բանակցությունների վրա ազդելու փորձերի մեջ

Ռուսաստանի նախագահ Վլադիմիր Պուտինը «Ռոսիա 24» հեռուստաալիքի եթերում հայտարարել է, որ արևմտյան երկրները հայտարարել են Ուկրաինային արկեր մատակարարելու իրենց մտադրության մասին, այդ թվում՝ աղքատացված ուրան, միևնույն ժամանակ, երբ ինքը Մոսկվայում բանակցություններ էր վարում Չինաստանի նախագահ Սի Ծինփինի հետ։ Նա նրանց դատապարտել է այն բանի համար, որ այդ կերպ փորձել են խաթարել երկու երկրների ղեկավարների բանակցությունները կամ ազդել դրանց վրա։

Նա բացատրել է, որ այն օրը, երբ Սի Ծինփինի հետ քննարկել է Ուկրաինայում չինական կարգավորման ծրագրի դրական կողմերը, հայտնի է դարձել, որ Արևմուտքը Կիևին է փոխանցելու մեկ միլիոն արկ։ Հաջորդ օրը, պետության ղեկավարի խոսքով, մամուլի հետ հանդիպումից անմիջապես առաջ Բրիտանիան հայտարարեց Ուկրաինային աղքատացված ուրանի արկեր մատակարարելու ծրագրերի մասին։

«Կարծես թե արևմտցիները (Արևմուտքի երկրները - խմբ․) դա միտումնավոր են արել, որպեսզի ինչ-որ կերպ կամ խափանեն մեր բանակցությունները, կամ ազդեն դրանց վրա, ես նույնիսկ չգիտեմ ինչու»,- ասել է Պուտինը՝ կարծիք հայտնելով, որ դա միտումնավոր է արվել։