Իրանի ազգային անվտանգության խորհրդի քարտուղարն իր հնդիկ գործընկերոջ հետ քննարկել է «Հյուսիս-Հարավ» միջանցքը

Իրանի ազգային անվտանգության բարձրագույն խորհրդի քարտուղար, կոնտրծովակալ Ալի Շամխանին իր հնդիկ գործընկեր Աջիթ Կումար Դովալի հետ հեռախոսազրույցում իր պատրաստակամությունն է հայտնել զարգացնելու տարածաշրջանային բազմակողմ համագործակցությունը, հաղորդում է Irna գործակալությունը։

Շնորհավորելով Շամխանիին Իրանի և Սաուդյան Արաբիայի միջև հարաբերությունների վերականգնման վերաբերյալ համաձայնագրի կապակցությամբ՝ Դովալը հայտարարել է Հնդկաստանի պատրաստակամությունը զարգացնելու տարածաշրջանային բազմակողմ համագործակցությունը։

Նա Իրանին և Սաուդյան Արաբիային անվանել է տարածաշրջանում երկու ազդեցիկ երկրներ՝ նշելով, որ ձեռք բերված համաձայնությունը կարևոր քայլ է համարվում տարածաշրջանում կայունության և անվտանգության զարգացման գործում։

Կողմերը հեռախոսային բանակցություններ են վարել նաև պատժամիջոցների վերացման, Չաբահար նավահանգստում երկկողմ համագործակցության ճանապարհին խոչընդոտների վերացման և «Հյուսիս-Հարավ» միջազգային տրանսպորտային միջանցքի ավարտին Հնդկաստանի մասնակցության շուրջ։

Շամխանին իր հնդիկ գործընկերոջը հրավիրել է այցելել Իրան՝ երկկողմ և տարածաշրջանային համագործակցությունն ամրապնդելու նպատակով։