ՀՀ-ն՝ որպես իննովացիոն տեխնոլոգիաների հաբ աշխարհում․ Հայաստանում տեղի ունեցավ Doing Digital Forum-ը (տեսանյութ, լուսանկարներ)

Այսօր տեղի ունեցավ Doing Digital ֆորումը, որի հիմնադիրն ու կազմակերպիչը SPRING PR ընկերությունն է։ Այն մրցանակակիր ընկերություն է, որը հիմնադրվել է 2009 թվականին և մասնագիտացած է ռազմավարական PR-ի, թվային հաղորդակցությունների, միջոցառումների կազմակերպման, հաղորդակցությունների կառավարման և հետազոտությունների ոլորտներում: Ընկերությունը համագործակցում է ինչպես տեղական, այնպես էլ միջազգային մի շարք խոշոր, փոքր և միջին ձեռնարկությունների, պետական կառույցների, հասարակական և բարեգործական կազմակերպությունների հետ:

SPRING PR-ը համաշխարհային PR համայնքի մաս է և անդամակցում է միջազգային այնպիսի հեղինակավոր կառույցների, ինչպիսիք են PR-ի միջազգային ասոցիացիան (IPRA), Հասարակայնության հետ կապերի կանոնակարգող ինստիտուտը (CIPR), Համաշխարհային հաղորդակցության ֆորում ասոցիացիան (WCFA):

Հատկանշական է՝ Ամերիաբանկը Doing Digital ֆորումի համակազմակերպիչն է: Ամերիան ավելին է, քան պարզապես բանկ. այն առաջատար ֆինանսական և տեխնոլոգիական հաստատություն է Հայաստանում՝ նորարարությունների և հաճախորդակենտրոն լուծումների հարուստ փորձառությամբ: Ամերիաբանկը ՀՀ տնտեսական ոլորտի նշանակալի դերակատարներից է, որի ակտիվները գերազանցում են 1 տրիլիոն ՀՀ դրամը:

Ընթանալով թվայնացման ճանապարհով` Բանկը ներդրել է մի շարք  նորարար ծրագրեր ու բեկումնային հարթակներ, որոնք գերազանցում են մարդկանց հիմնական բանկային կարիքները՝ ստեղծելով դինամիկ զարգացող ֆինանսա-տեխնոլոգիական միջավայր: Ամերիան Հայաստանում առաջինն է ստեղծել էկոհամակարգեր ՓՄՁ-ների և անհատների համար` ապահովելով հասանելիություն  բանկային և ոչ բանկային մի շարք ծառայությունների մեկ պատուհանի սկզբունքով` Estate.ameriabank.am, Automarket.ameriabank.am, Sme.ameriabank.am:

Միջոցառման ինովացիոն գործընկերը Visa ընկերությունն է, բլոկչեյն գործընկերը Fastex-ն է, իսկ ներդրումային գործընկերը՝ Apricot Capital-ը։

Doing Digital Forum-ի գլխավոր խոսնակը թվային փոխակերպումների և ֆինթեքի միջազգային փորձագետ Քրիս Սքիներն է, որը տեխնոլոգիաների և ֆինանսական շուկաների ամենաազդեցիկ մասնագետներից ու ամենավաճառվող հեղինակներից մեկն է աշխարհում:

Վերջինս աշխարհում ամենավաճառվող հեղինակներից է և ֆինանսական շուկաների ու ֆինթեքի ոլորտում անկախ մեկնաբան, ով ամենաօրյա թարմացումներ է ներկայացնում իր բլոգի՝ thefinanser.com-ի միջոցով: Նա թվային փոխակերպման վերաբերյալ խորհրդատվություն է տրամադրել խոշոր ընկերությունների ղեկավարներին ու միջազգային կառույցներին, այդ թվում՝ ՄԱԿ-ին, Համաշխարհային բանկին, Համաշխարհային տնտեսական ֆորումին և այլն:

«Կարծում եմ՝ չափազանց կարևոր է հասկանալ, թե ինչպես է աշխարհը թվայնացվում և փոխակերպվում: Սրա մասին ընկալումը պետք է բերել Հայաստան ևս, որի համար էլ կա 2 պատճառ: Առաջինն այն է, որ եթե սույն տարածաշրջանի երկրները չեն ներգրավվել թվայնացմանը, կկորցնեն տնտեսության մրցակցային առավելություններն ու տարածաշրջանից դուրս գտնվող երկրներից հետ կմնան: Հաջորդ պատճառն էլ՝ հնարավորությունն է. տարածաշրջանային երկրների շարքում Հայաստանը կարող է իրեն դիրքավորել որպես տարածաշրջանային կերպով թվայնացման տեխնոլոգիաների ինտեգրի հիմնական կենտրոն»,- կարևորում է Սքինները:

Ֆորումի շրջանակում ելույթների ու պանելային քննարկումների միջոցով բիզնեսի ու թվային տեխնոլոգիաների ոլորտում լավագույն փորձով, իրենց գիտելիքով և տեսլականով կիսվեցին շուրջ 20 խոսնակ Սինգապուրի սոցիալական գիտությունների համալսարանից ու Forbes-ից, McKinsey, Visa, Fastex, Apricot Capital, Revytech, Hexens, Beta Financial Technologies, ICDT Global ընկերություններից, FAST հիմնադրամից, ինչպես նաև ՀՀ կառավարությունից, Կենտրոնական բանկից, «Հայաստանի տեղեկատվական համակարգերի գործակալություն» հիմնադրամից, SPRING PR ու Ամերիաբանկ ընկերություններից։

«Այս ֆորումի նպատակն է համախմբել էկոհամակարգը և ՀՀ-ն ներկայացնել աշխարհին՝ որպես իննովացիոն և նորարար տեխնոլոգիաների հաբ: Հիմա ճիշտ ժամանակն է խոսել այն աշխատանքներից ու փորձից, որոնք ընկերությունները ձեռք են բերել այս ճանապարհի ընթացքում, ինչպես նաև հասկանալ, թե ինչ խնդիրներ կան՝ մեջբերելով միջազգային փորձը: Նշեմ, որ ֆորումը շարունակվելու է Երևանում՝ կրելով ամենամյա բնույթ: Տարվա ընթացքում ևս ունենալու ենք հյուրեր, որոնք լինելու են թե՛ տեղական մասնագետներ, թե՛ օտարերկրյա, որոնց տրամադրելու ենք մեր հարթակը՝ շփման և փորձի փոխանակման համար: Պետք է վստահաբար ասեմ, որ Հայաստանի նկատմամբ հետաքրքրությունը մեծ է»,- ասում է Ֆորումի հիմնադիր ու կազմակերպիչ SPRING-PR-Company ընկերության համահիմնադիր Տաթևիկ Սիմոնյանը:

Ամերիաբանկի Իննովացիաների և թվայնացման գծով տնօրեն Արտյոմ Շամցյանի խոսքով էլ՝ Ամերիաբանկը գտնվում է թվային փոխակերպման ընթացքում ու սա լավ հնարավորություն է մեր փորձի ներկայացման համար՝ իրականացնելով մեր սոցիալական պատասխանատվությունը:

«Ամերիաբանկն անցել է տրանսֆորմացիայի 3 փուլեր, որոնք անցել ենք՝ որդեգրելով բոլոր համապատասխան թվային լուծումները: Կարևոր է, որ այս ամենը մենք անում ենք միջազգային ստանդարտներին համապատասխան: Մենք հիմա փոխակերպման փուլում ենք, որի համար էլ մշակում ենք համապատասխան ճարտարապետություն, որպեսզի սահուն կերպով անցում կատարենք դրան: Սա դեռ սկիզբն է»,- նշում է նա:

Doing Digital Forum-ը բոլոր նրանց համար է, ովքեր հետաքրքրված են թվային փոխակերպմամբ, դրա ներդրմամբ ու թվային տնտեսության զարգացմամբ,  այդ թվում՝ բիզնեսի առաջնորդներ, ՏՏ մասնագետներ, ստարտափներ, ներդրողներ և վենչուրային կապիտալիստներ, PR-ի, մարքեթինգի ու վաճառքի մասնագետներ, պետական կառույցների աշխատակիցներ և այլն: