ՆԱՏՕ-ի գլխավոր քարտուղարը Չինաստանին հիշեցրել է Ռուսաստանին զենք մատակարարելու դեպքում հետեւանքների մասին

ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ Չինաստանը կարող է բախվել հետևանքների, եթե Ռուսաստանին զենք մատակարարի Ուկրաինայում օգտագործելու համար։ Այդ մասին նա ասել է Բրյուսելում դաշինքի անդամ երկրների արտգործնախարարների հանդիպման արդյունքներով։

 Ըստ Ստոլտենբերգի՝ ՆԱՏՕ-ն ապացույցներ չունի, որ Չինաստանը մահացու օգնություն է ցուցաբերել Ռուսաստանի Դաշնությանը։ Սակայն նման օգնությունը, ընդգծել է գլխավոր քարտուղարը, կլինի պատմական սխալ և կունենա էական հետևանքներ։

 Հյուսիսատլանտյան դաշինքի ղեկավարը չի ասել, թե ինչ հետեւանքների մասին է խոսքը, սակայն նշել է, որ Պեկինը տեղյակ է, որ հետեւանքներ կարող են լինել։

 Ավելի վաղ Ստոլտենբերգը Բրյուսելում ՆԱՏՕ-ի նախարարական հանդիպման նախօրեին կայացած մամուլի ասուլիսում ասել էր, որ «այն, ինչ տեղի ունեցավ Ուկրաինայում», կարող է կրկնվել Արևելյան Ասիայում՝ Չինաստանի և Ռուսաստանի մերձեցման ֆոնին։