Իսրայելը Կիևին զենք մատակարարելու վերաբերյալ որոշումներ չի կայացրել․ Նեթանյահու

Իսրայելի վարչապետ Բենիամին Նեթանյահուն, ելույթ ունենալով Թել Ավիվում պաշտպանության նախարարության կենտրոնակայանում, ասել է, որ հրեական պետությունը Ուկրաինայի հետ կապված շարունակում է սահմանափակվել մարդասիրական օգնություն տրամադրելով և որոշումներ չի կայացրել Կիևին իսրայելական զենքի հնարավոր մատակարարման վերաբերյալ։ Այս մասին հայտնում է ՏԱՍՍ-ը։

Ավելի վաղ CNN-ը հայտնել էր, որ Պենտագոնի գաղտնի փաստաթղթերը, որոնք հայտնվել են համացանցում, դիտարկում են Իսրայելի կողմից Ուկրաինային մահաբեր զենք մատակարարելու սցենարներ։

Լրագրողները Նեթանյահուին խնդրել են մեկնաբանել համացանցում ԱՄՆ պաշտպանական կառույցների՝ իբր գաղտնի տեղեկություններ պարունակող փաստաթղթերի հրապարակումը։ Կառավարության ղեկավարի խոսքով՝ ինքը պատկերացում չունի, թե ինչի վրա են հիմնված Ուկրաինային մահաբեր զենքեր մատակարարելու մասին հաղորդումները։

«Մենք որոշեցինք օգնել նրանց հումանիտար հարցերում և քաղաքացիական պաշտպանության ոլորտում՝ «Ցևա ադոմ» («Կարմիր գույն» - Իսրայելի օդային հարձակման նախազգուշացման համակարգ) և նման բաներ, բայց տեղյակ չեմ մահաբեր զենքի վերաբերյալ նախկին իշխանության կամ իմ ներկայիս կառավարության որևէ որոշման մասին»,- պատասխանել է վարչապետը։

CNN-ը նաև հաղորդել է, որ Կիևը ստիպված է եղել փոխել «որոշ ռազմական պլաններ»՝ Պենտագոնի գաղտնի փաստաթղթերի առցանց հրապարակումից հետո: