Սուդանում ռազմական գործողությունների հետևանքով հայեր չեն տուժել. ԱԳՆ խոսնակ

Սուդանի մայրաքաղաք Խարթումում զարգացումների հետևանքով հայեր չեն տուժել։ Տեղեկությունը հայտնում է ՀՀ ԱԳՆ խոսնակ Անի Բադալյանը` հավելելով, որ հայկական եկեղեցին նույնպես չի վնասվել։

Նշենք, որ Սուդանում ռազմական գործողությունները հիմնականում տեղի են ունենում մայրաքաղաք Խարթումի օդանավաայանի տարածքում, որը հայկական եկեղեցուց գրեթե 2 կմ է հեռու։

ՀՀ ԱԳՆ խոսնակը նշեց, որ ՀՀ դիվանագիտական ներկայացուցչությունը մշտապես կապի մեջ է Սուդանում բնակվող փոքրաթիվ հայ համայնքի ներկայացուցիչների հետ:

Սուդանում աշխատող մի քանի ՀՀ քաղաքացիների կյանքին նույնպես վտանգ չի սպառնում:

Հիշեցնենք` ապրիլի 15-ին Սուդանում մարտեր են սկսվել արագ արձագանքման ուժերի (ԱԱՈւ) և կանոնավոր բանակի միջև։ Առաջինները հայտարարել են, որ իրենց վերահսկողության տակ են վերցրել Հանրապետության պալատը (նախագահական պալատը) Խարթումում, մայրաքաղաքի միջազգային օդանավակայանը, ինչպես նաև Մերոեի օդային բազան: Արագ արձագանքման ուժերը կանոնավոր բանակին մեղադրում են իրենց` մայրաքաղաքում գտնվող բազայի վրա հարձակվելու համար՝ բոլոր տեսակի զենքերի օգտագործմամբ:

Սուդանի բժիշկների կենտրոնական կոմիտեն հայտնել է, որ ապրիլի 13-ից ի վեր Սուդանում տեղի ունեցած բախումների ընթացքում մահացել է 97 մարդ, վիրավորվել՝ 942-ը: