Ռուսաստանում Բայդենին մեղադրել են ուկրաինացիների ցեղասպանության մեջ

Պետդումայի նախագահ Վյաչեսլավ Վոլոդինը ԱՄՆ նախագահ Ջո Բայդենին մեղադրել է «Հյուսիսային հոսք» և «Հյուսիսային հոսք 2» գազատարների վրա ահաբեկչական հարձակման, Ուկրաինայում խաղաղ բնակչության ցեղասպանության և եվրոպական տնտեսության ոչնչացման, ինչպես նաև կենսաբանական տեխնոլոգիաների ստեղծման մեջ, գրում է Gazeta-ն։

«Ցուցակը շարունակելի է»,- գրել է Վոլոդինը Telegram-ի իր ալիքում։

Այսպես է խորհրդարանականը մեկնաբանել Բայդենի որոշումը՝ մասնակցելու 2024 թվականի նախագահական ընտրություններին։ Վոլոդինի խոսքով՝ երկրորդ նախագահական ժամկետի հաշվին՝ Բայդենը ձգտում է խուսափել իր «հանցագործությունների» պատասխանատվությունից։

Ապրիլի 25-ին Ջո Բայդենը պաշտոնապես հայտարարեց 2024 թվականին ԱՄՆ նախագահի պաշտոնում առաջադրվելու իր մտադրության մասին։ Նա հայտարարեց, որ «յուրաքանչյուր սերունդ ունենում է պահեր, երբ պետք է տեր կանգնել ժողովրդավարությանը»։ Փոխնախագահ Քամալա Հարիսը նույնպես ասաց, որ պատրաստ է կրկին լինել Բայդենի «երկրորդը»։ Եթե ​​Բայդենը վերընտրվի, նա 82 տարեկանում կդառնա ԱՄՆ հաջորդ նախագահը։