Citigroup-ը 25,9 մլն դոլար կվճարի ամերիկահայերի նկատմամբ խտրականության համար

Ամերիկյան Citigroup Inc. բանկն ստիպված կլինի վճարել 25,9 մլն դոլարի տուգանք և փոխհատուցում՝ կապված վարկային քարտերի տրամադրման ժամանակ հայազգի ամերիկացիների նկատմամբ խտրականության հետ։

Սպառողների ֆինանսական պաշտպանության բյուրոյի (CFPB) զեկույցի համաձայն՝ 2015-ից 2021 թթ. Citi-ն մերժել է վարկային քարտ տրամադրել այն դիմորդներին, որոնց բանկի աշխատակիցները նույնականացրել են որպես ամերիկահայեր՝ ելնելով նրանց ազգանունից:

«CFPB-ն պարզել է, որ Citi-ն միտումնավոր խտրականություն է դրսևորում հայկական ծագում ունեցող դիմորդների նկատմամբ՝ հիմնվելով հիմնականում նրանց ազգանվան արտասանության վրա», - հայտարարել է CFPB–ի տնօրեն Ռոհիտ Չոպրան: «Բանկը կարծրատիպային կերպով համարել է, որ հայերը հակված են հանցագործության և խարդախության: Իրականում Citi-ն անօրինական կերպով կեղծել է փաստաթղթերը՝ թաքցնել խտրականությունը»:

Citi-ի ղեկավարները հրահանգել են աշխատակիցներին չքննարկել այս պրակտիկան գրավոր կամ ձայնագրված հեռախոսային խոսակցություններում, նշվում է CFPB-ի հաղորդագրությունում:

«Citi-ի աշխատակիցները ստել են դիմորդներին քարտեր տրամադրելուց հրաժարվելու հիմքերի մասին՝ նշելով մտացածին պատճառներ», - ասել է Չոպրան: