Wall Street Journal. Սերժ Սարգսյանը կոչ է արել միջազգային կառույցներին օգնել նվազեցնել լարվածությունն Ադրբեջանի և Հայաստանի միջև

ՀՀ նախագահ Սերժ Սարգսյանը ս.թ. նոյեմբերի 8-ին հարցազրույց է տվել Wall Street Journal պարբերականի լրագրող Ջո Փարքինսոնին: Ուշագրավ է, որ վերջինս հանդիսանում է նշյալ պարբերականի Ստամբուլի բյուրոյի ղեկավարը:

Լրագրողի այն հարցին, թե առաջիկայում ինչպես կարող են զարգանալ հարաբերությունները ՀՀ-ի և Ադրբեջանի միջև, և որն է հակամարտության լուծման բանալին, Սերժ Սարգսյանը նշել է, որ վերջին շրջանում իրավիճակն իրոք առավել քան լարված է:

Ըստ ՀՀ նախագահի՝ հայկական կողմը խիստ մտահոգված է Ադրբեջանի՝ ԼՂ տարածքը զինված հակամարտության մեջ ներգրավելու ցանկությամբ։ Մանրամասնելով Ադրբեջանի կողմից ռազմական լուծման տարբերակը նախընտրելու և այն արտաքին քաղաքականության մեջ շրջանառելու նպատակները՝ երկրի ղեկավարն ընդգծել է, որ իրավիճակի վատթարացման դեպքում հայկական զինված ուժերը կարող են «անհամաչափ» ուժեղ պատասխան տալ։

20 տարի շարունակվող այս խնդիրը դեռևս հնարավոր է դարձել կայունացնել հակամարտության շուրջ ծավալված խաղաղ բանակցություններով, և ըստ նախագահի՝ ինքը կողմ է, որ հիմնահարցն ի վերջո կարգավորվի այդ բանակցությունների շրջանակներում։
Ընդգծելով պաշտոնական Բաքվի ռազմական հռետորաբանությունը՝ Սերժ Սարգսյանը նշել է, որ Ադրբեջանը, ցավոք, հարմար առիթ է փնտրում հակամարտության վերսկսման համար։ Նշվել է, որ նման քաղաքական սխալը կարող է վնասել ԼՂ-ի և Հայաստանի ժողովրդին, սակայն կորուստների և վնասի տեսակետից անմասն չի մնալու նաև Ադրբեջանը, որի կրած կորուստները, հնարավոր է, անհամեմատ ավելին լինեն:

Լրագրողի այն հարցին, թե վերջին շրջանում, ըստ ստացված տվյալների, բավականին մեծացել է լարվածությունը հայ-ադրբեջանական սահմանում, դրա հետ կապված ինչ զարգացումներ են սպասվում առաջիկայում, Սարգսյանը փոխանցել է, որ դա իրականություն է: Ադրբեջանի նման սադրանքների արդյունքում կողմերը փոխադարձ հրաձգության են ենթարկվում. զարգացումների առումով նշվել է, որ իրավիճակը լիովին վերահսկելի է հայկական կողմից։

Ջո Փարքինսոնը, անդրադառնալով Ադրբեջանի ռազմական հռետորաբանության ակտիվացմանը, նշել է, որ այն ակնհայտ է դարձել այս տարվա օգոստոսին, «երբ Ադրբեջանի նախագահը որպես հերոս ընդունեց Ռամիլ Սաֆարովին, ով 2004-ին ՆԱՏՕ-ի դասընթացի ընթացքում կացնահարել էր հայ սպա Գուրգեն Մարգարյանին»։ Վերջինիս փոխանցմամբ՝ փաստը դիվանագիտական փակուղի ստեղծեց ՀՀ-ի և Հունգարիայի միջև, որի արդյունքում Հայաստանը խզեց իր դիվանագիտական հարաբերությունները Հունգարիայի հետ։

Խնդիրը մանրամասնելուց հետո Wall Street Journal-ի լրագրողը Սերժ Սարգսյանին հղել է հետևյալ հարցադրումը. «Ի՞նչն է պատճառը, որ Ադրբեջանում նման հայատյացության մթնոլորտ է ստեղծվել»: Հարցին ի պատասխան՝ նախագահ Սարգսյանը նշել է, որ ալիևյան վարչակարգի կողմից նման քաղաքականության, նման ատելության մթնոլորտ խրախուսելն առավել նախընտրելի է, քան իրականում զբաղվել այդ մթնոլորտի վերացման հետևանքներով։

Ըստ Սերժ Սարգսյանի՝ կապված Սաֆարովի դեպքի հետ, փաստ է, որ Ադրբեջանը մերժում է միջազգային քննադատությունն այս հարցում։ Նախագահ Ալիևը հայտարարում է, որ ներում շնորհված է՝ համաձայն Սահմանադրության, որը, ըստ շատ քաղաքական ղեկավարների, առավել քան սուբյեկտիվ գնահատական է՝ չհիմնավորված որևէ միջազգային նորմերով։

Ըստ WSJ-ի՝ Բաքուն զինվելու համար անցյալ 5 տարիների ընթացքում ծախսել է 11 մլրդ՝ Հայաստանի 2 մլրդ-ի համեմատ։ Սերժ Սարգսյանի փոխանցմամբ՝ ՀՀ-ն կհարվածի Ադրբեջանին միայն այն դեպքում, եթե ԼՂ-ն կամ Հայաստանը կենթարկվեն հարձակման։

Իր հարցազրույցում Սերժ Սարգսյանը նաև զգուշացրել է, որ ռազմական հարձակման հնարավորությունն Իրանի վրա, որի հետ Հայաստանը միջպետական սահման ունի, «խիստ մտահոգիչ է», և իրադարձությունների զարգացումը կարող է նաև խթանել հակամարտությանը ՀՀ-ի և Ադրբեջանի միջև։

Իր խոսքում ՀՀ նախագահը, ամփոփելով վերը նշվածը, ընդգծել է, որ կոչ է անում միջազգային կառույցներին առավել ներգրավված լինել տարածաշրջանում առկա գործընթացներում, որը կարող է օգնել նվազեցնելու ճնշումն Ադրբեջանի և Հայաստանի միջև։ Ըստ Սերժ Սարգսյանի՝ «եթե մենք ապրեինք մեկուսացված տարածաշրջանում, որտեղ միջազգային ազդեցություն չլիներ, պատերազմն արդեն սկսված կլիներ»։