Իրանի թուլացման պարագայում մենք տուժելու ենք․ քաղտեխնոլոգը՝ Թրամփի հաղթանակից հետո Հարավային Կովկասում զարգացումների մասին

ԱՄՆ նախագահի 47-րդ ընտրություններում Հանրապետականների թեկնածու Դոնալդ Թրամփի հաղթանակը լրիվ սպասելի էր։ Այս կարծիքը ԼՈՒՐԵՐ.com-ի հետ զրույցում հայտնեց քաղտեխնոլոգ Արմեն Բադալյանը։

«Այստեղ պիտի հաշվի առնել այն հանգամանքը, որ երկրում տնտեսական և ներգաղթյալների խնդիրն էականորեն բարդացել է, ինչը մեծ հարված է ԱՄՆ-ին։ Կա նաև մի հանգամանք՝ իրականում Թրամփը պիտի բերվեր այս պաշտոնին, որ արտաքին քաղաքականությունում որոշակի խնդիրներ լուծեր, որոնք Քամալա Հարիսը չէր կարող լուծել»,- ասաց Բադալյանը՝ համարյա կրկնելով այն վարկածը, որ իշնխանության փոխանցում է եղել ԱՄՆ-ում։

«Դեմոկրատները սկզբից առաջադրեցին մարազմատիկ Ջո Բայդեն թեկնածությունը, որը տարիքի հետ կապված խնդիրներ ուներ, հետո նրան հանեցին ու դրեցին փոխնախագահ Քամալա Հարիսին։ Փոխնախագահի միակ առավելությունն իր շքեղ ծիծաղն էր։ Ուրիշ որևէ առավելություն նա չուներ» ,- ընդգծեց քաղտեխնոլոգը։

Այն, որ սոցհարցումներով է ստեղծվել այնպիսի պատկեր, որտեղ գրեթե զուգահեռ պայքար էր տարվում Թրամփի և Հարիսի միջև․ վստահ է քաղտեխնոլոգը։

«Նկարագրություն տվեցին, որ իբրև թե հավասար պայքար է գնում, և Հարիսի հաղթանակից 5 է պակաս։ Սրանով էլ մարդկանց դրդեցին, որ ընտրության գնան ու ընտրեն Թրամփին ու ամենակարևորը՝ հավատան, որ հենց իրենք՝ ամերիկացիները Թրամփին ընտրեցին նախագահի պաշտոնում» ,- նշեց նա։

Նախագահական ընտրությունների ընտրապայքարում Թրամփը բազմիցս պնդել է, որ նախագահ դառնալու դեպքում արագ կկարգավորի ռուս-ուկրաինական հակամարտությունն ու կդադարեցնի պատերազմները: Բադալյանն այս մասին հակառակ կարծիքն ունի։ Այստեղ Ուրաինայի հարցն առևտրի առարկա է դառնալու։

«Նախընտրական քարոզարշավի ժամանակ շատ մտքեր կարող են հնչել, բայց իրականություն վերադառնալու ժամանակ դրանք կարող են հօդս ցնդել ու հակառակն արվել։ Այս ամենի համատեքստում ռուսական կողմից այլ պահանջներ են ներկայացվում։ Եթե ռուսական կողմը ստանա իր ուզածն, ապա կդադարեցվի պատերազմը։ Եթե չստացավ, ապա ռազմական գործողությունները կշարունակվեն, ռուսական կողմն առաջ է գնալու» ,- նշեց քաղտեխնոլոգը՝ շեշտելով՝, որ այս պահին ռուսները լուրջ հաջողություններ են գրանցում ռազմի դաշտում, նոր տարածքներ գրավում։

«Բոլոր շրջանառվող թեզերը, թե Թրամփի ընտրվելուց հետո ավարտվելու է ռուս-ուկրաինական հակամարտությունը, սխալ ենթադրություն է։ ԱՄՆ-ն այս հակամարտության վրա 160 միլիարդ դոլար գումար է ներդրել (զենք-զինամթերք, ռազմատեխնիկա, զինվորական պատրաստվածություն և այլն,- խմբ․)։ Այս պարագայում ինչպե՞ս կարող է ասել՝ Ռուսաստան, այդ 160 միլիոնը քեզ նվեր» ,- ասաց Բադալյանը։

Ոչ ոք չգիտի, թե աշխարհաքաղաքական ինչ փոփոխություններ կլինեն Թրամփի իշխանության գալուց հետո․ ասում է քաղտեխնոլոգը։ Ի տարբերություն Հայաստանի՝ ԱՄՆ-ում միանձնյա որոշումներ չեն կայացվում։

«Հայաստանում մեկը կար չէ՞, որ ասեց՝ Արցախի քաղաքականությունը 0-ից եմ սկսում ու արդյունքում տեսան՝ ինչ եղավ։ Ամերիկան այդ երկիրը չէ։ Այնտեղ ինստիտուտներ կան, խորքային, բազմաշերտ կառավարումով պետություն է։ Մեկ այլ կարևոր կետ էլ կա․ Թրամփը լրիվ նոր թիմ պիտի ձևավորի, լրիվ նոր մարդկանց պաշտոններում նշանակի»։

Թրամփի ԱՄՆ նախագահի պաշտոնում վերընտրվելու և հետագան կանխատեսելու համատեքստում պետք է կարևորել մեր հարևան Իրանի գործոնը․ ընդգծեց քաղտեխնոլոգը։ «ԻԻՀ-ի թուլացման պարագայում, մենք տուժելու ենք, որովհետև Ադրբեջանը մտնելու ու «վերցնելու է» Սյունքի ու Վայոց ձորի մարզերը, տեղաբնակներին էլ քշելու են իրենց բնօրրանից։ Գրավված տարածքներում թշնամին ադրբեջանցիներով է բնակեցնելու։ Սևանի կողմից էլ է մտնելու ու Վարդենիսի կողմից գրավի Սևանա լիճը, ինչի դեպքում Սևանա լճում լողալու մասին կարող ենք մոռանալ» ,-շեշտեց նա։

Քաղաքագետն ավելի հեռահար ժամկետի համար չի շտապում դատողությունների անել, ասում է՝ պետք է դեռ սպասել ՝Թրամփն ու՞մ կնշանակի Պետքարտուղարի պաշտոնում, եւ ովքեր կնշանակվեն Ազգային անվտանգության հարցով խորհրդական, ՊՆ և Կենտրոնական հետախուզական վարչության պետի պաշտոններում։