Հնարավոր է՝ առաջիկայում դեղորայքի պակաս լինի․ մանրամասներ՝ Սիրիայում տիրող իրավիճակից

Սիրիայում Բաշար Ասադի իշխանության տապալումից հետո այդ երկրի հայ համայնքի համար առաջիկայում երկու կարևորագույն խնդիր կա․ առաջինն այն է, որ համայնքի անվտանգությունը երաշխավորված լինի, երկրորդը, որ նոր ձևավորվող իշխանությունների կողմից հարգվեն ինչպես հայերի կրոնական, այնպես էլ մշակութային իրավունքներն ու յուրահատկությունները։ 

«Արմենպրես»-ի հետ զրույցում այս մասին ասել է Հալեպում գործող հայկական «Գանձասար» շաբաթաթերթի խմբագիր Զարմիկ Պողիկյանը՝ խոսելով Սիրիայում տիրող իրավիճակի, քաղաքացիների՝ այդ թվում նաև հայերի շրջանում տիրող տրամադրությունների, ինչպես նաև սպասվող իրադարձությունների մասին:

«Սիրիայում հայ համայնքի համար այժմ գոյություն ունի երկու կարևորագույն խնդիր. Առաջինը՝ տեսնել, որ համայնքի անվտանգությունը պաշտպանված է, և երկրորդը՝ համայնքի ինչպես կրոնական, այնպես էլ մշակութային իրավունքներն ու յուրահատկությունները լինեն հարգված իշխանությունների համար››,- նշեց Պողիկյանը:  

Նա տեղեկացրեց, որ Հալեպում այս պահին իրավիճակը կայուն է և, ընդհանուր առմամբ, քաղաքացիների մոտ տիրում է սպասողական վիճակ, քանի որ Սիրիայում դեռևս անցումային կառավարություն է կազմվում:

‹‹Հալեպում իրավիճակը հանդարտ է: Մարդիկ զգույշ են, սպասողական վիճակ է տիրում: Այս պահի դրությամբ հացի և այլ սննդամթերքի առումով տագնապ չկա, այդուհանդերձ, հնարավոր է՝ առաջիկայում դեղորայքի պակաս լինի: Տեսնենք, թե առաջիկայում ինչ կլինի››,-նշեց Պողիկյանը՝ ներկայացնելով տիրող իրավիճակը:

Նրա փոխանցմամբ՝ ամենամեծ դժվարությունը կապված է երկրի տնտեսական վիճակի հետ, իսկ հայ համայնքը փորձում է գործակցել տարբեր համայնքապետերի, զանազան միությունների հետ, որպեսզի կարողանա օգտակար լինել հայ հայերին: 

‹‹Հույս ունենք, որ իշխանության այս փախանցման շրջանը արագ և կազմակերպված ձևով կընթանա, որպեսզի դժվարություններ չստեղծվեն, և ժողովուրդը կկարողանա աստիճանաբար իր բնականոն կյանքին վերադառնալ››,-նշեց Զարմիկ Պողիկյանը:

Անդրադառնալով երկրում հասարակ քաղաքացիների նկատմամբ զինյալների ցուցաբերած վերաբերմունքին՝ Պողիկյանը նկատեց, որ վերաբերմունքն առայժմ դրական է:

‹‹Ժողովրդի նկատմամբ վերաբերմունքն առայժմ դրական է, և նրանք խոստանում են հարգել Սիրիայի ժողովրդի բոլոր բաղադրիչները: Նրանք հավատում են, որ Սիրիան՝ ժողովրդի այս գունեղ պատկերով, միասնական ձևով պետք է առաջ ընթանա: Հավատում են, որ բոլորի իրավունքները պետք է պաշտպանված լինեն. առայժմ այդպես են հայտարարում: Նաև խոստանում են, որ ոչ մեկ կրոնական դժվարություն չպետք է ունենա, բոլոր համայնքները պետք է պահպանեն իրենց կրոնական և մշակութային ինքնությունը››,-մանրամասնեց Հալեպում լույս տեսնող հայկական «Գանձասար» շաբաթաթերթի խմբագիր Զարմիկ Պողիկյանը:

Խոսելով Հալեպում տիրող ընդհանուր տրամադրությունների մասին՝ Պողիկյանը տեղեկացրեց, որ արդեն այս օրերին 30 ընտանիք անձնական մեքենաներով Լաթաքիայից վերադարձել է Հալեպ:

‹‹Հալեպում իրավիճակը կայուն է: Լաթաքիայում, օրինակ, նախօրեին մտահոգություններ կային, որոշակի անվտանգային անկայուն իրավիճակ էր, քանի որ նրանց մոտ ընդդիմության ներկայության առումով սկզբնական օրերն էին: Ինչ վերաբերում է Դամասկոսին, ապա այնտեղ նույնպես առաջին օրերին, երբ նախկին իշխանությունը տապալվում էր, քաղաքում տիրում էր անկառավարելի վիճակ, սակայն երբ արդեն այսօր կապ հաստատեցի Դամասկոսի հետ, տեղեկացա, որ իրադրությունը հանդարտ է, իսկ մարդիկ զուսպ սպասում են, որպեսզի որքան հնարավոր է շուտ պետական համակարգի բաղադրիչները վերսկսեն իրենց գործունեությունը››,-եզրափակեց Զարմիկ Պողիկյանը՝ ընդգծելով, որ բոլորի մոտ սպասողական վիճակ է տիրում, բայց այժմ իրադրությունն ավելի հանգիստ է, քան մի քանի օր առաջ:

Սիրիայի հակակառավարական ուժերը  Հոմս քաղաքը գրավելուց հետո առանց դիմադրության հանդիպելու դեկտեմբերի 8-ին գրավել էին մայրաքաղաք Դամասկոսը։ Նախագահ Բաշար ալ-Ասադը հեռացել էր երկրից՝ կառավարման լիազորությունները փոխանցելով վարչապետին: 

ՌԴ արտգործնախարարությունը հայտնել էր, որ Սիրիայի նախագահ Բաշար ալ-Ասադը սիրիական հակամարտության մի շարք մասնակիցների հետ բանակցություններից հետո որոշել է հրաժարական տալ և լքել Սիրիան՝ հրահանգելով խաղաղ ճանապարհով փոխանցել իշխանությունը։ 

Ռուսական ԶԼՄ-ները հայտնել են, որ Ասադը և նրա ընտանիքի անդամները ժամանել են Մոսկվա, և որ Ռուսաստանը նրանց ապաստան է տրամադրել՝ հումանիտար նկատառումներից ելնելով: