Ավինյանն իր վրա կվերցնի՞ արդյոք շուրջ 7,9մլն-ի հարվածը, թե՞ «փուռը կտա» իր աշխատակիցներից մեկին

Օրեր առաջ, Երևանի ներկայիս և նախկին քաղաքապետերի միջև տեղի ունեցած բանավեճի ժամանակ, Հայկ Մարությանը բարձրաձայնեց, որ Տիգրան Ավինյանի՝ ԱՄՆ ուղևորության արժեքը կազմել է 7,9 մլն դրամ։ Տիգրան Ավինյանն իբր զարմացավ, թե ինքը տեղյակ չի եղել, սակայն արդեն այսօր՝ դեկտեմբերի 23-ին, քաղաքապետարանում՝ նիստի ժամանակ, հայտարարեց, որ ինքը ևս իմացել է, թե որքանով է ձեռք բերվել տոմսը։

«Ես ինքս էլ ապշած էի այդ թվերից, հետո մի փոքր խորացա և հասկացա, որ կարծում եմ՝ ընդհանուր անպատասխանատվության և անտարբերության որոշակի խնդիր կա այստեղ, որովհետև նոյեմբերի 22-ի այցի համար տոմսերը ձեռք են բերվել նոյեմբերի 20-ին և, անկեղծ ասած, եթե օրինակ մեկ օր ուշացումով էլ ձեռք բերեինք, կարող է մի կրկնակի կամ եռակի ավելի թանկ ձեռք բերեինք։ Ես ուզում եմ տեղեկացնել, որ որոշում եմ կայացրել այդ ծախսը ամբողջապես փոխհատուցել ինքնուրույն՝ նաև կանխելով հետագա հարցերը»,- ասել է Ավինյանը։

Փաստորեն, Երևանի քաղաքապետը հասկացել է, որ այդտեղ կա անպատասխանատվության խնդիր, իսկ այդ անպատասխանատու անձը կամ անձինք, ովքեր ձեռք են բերել այդ տոմսերը, կրկին անպատիժ կմնան։ «Կպատժվի» միայն ինքը՝ Ավինյանը, ով սեփական միջոցներից կփոխատուցի այդ գումարը։ Հիշեցնենք, որ Երևանի քաղաքապետարանը թռիչքից մեկ օր առաջ՝ նոյեմբերի 22–ին, «Լաքշերի վոյաժ» ՍՊԸ–ի հետ կնքել է ծառայությունների ձեռքբերման պայմանագիր։

Պայմանագրի արժեքը կազմել է 12 միլիոն 465 հազար դրամ, և այն ձեռք է բերվել մեկ անձից, այսինքն՝ առանց մրցույթի։ Տեխնիկական բնութագրում որպես գնման առարկայի անվանում՝ նշված է «Երևան-Դոհա-Լոս Անջելես-Դոհա-Երևան էկոնոմ դասի 8 ավիատոմս»։ Մեկ ավիատոմս էլ բիզնես դասի է։ Ընդհանուր առմամբ, ձեռք է բերվել 9 ավիատոմս։ Բիզնես դասի մեկ ավիատոմսն արժեցել է 7 միլիոն 650 հազար դրամ, իսկ էկոնոմ դասի 8 ավիատոմսերը՝ 4 միլիոն 815 հազար դրամ։

Սա առաջին դեպքը չէ, երբ պետական այրերի անփութության արդյունքում՝ ոչ մեկը պատասխանատվության չի ենթարկվում, իսկ քաղաքապետի, և, ընդհանուր առմամբ, քաղաքապետարանի գործելաոճը, մեղմ ասած, հեռու է իրենց «հեղափոխական» հռչակած իշխանությունների տրամաբանությունից։