«Շանս չկա»․ Թրամփը դոլարին այլընտրանք ստեղծելու համար սպառնացել է BRICS-ի երկրներին
ԱՄՆ
BRICS-ի երկրները չպետք է փորձեն ստեղծել իրենց սեփական արժույթը միջազգային առևտրում կամ աջակցել որևէ այլ արժույթի՝ որպես ԱՄՆ դոլարի փոխարինող: Այս մասին հայտարարել է ԱՄՆ նախագահ Դոնալդ Թրամփը, որը կրկին սպառնացել է 100 տոկոսանոց մաքսատուրքեր մտցնել։
«Մենք կպահանջենք, որ այդ ակնհայտ թշնամական երկրները պարտավորվեն չստեղծել նոր BRICS արժույթ կամ աջակցել որևէ այլ արժույթի, որը կփոխարինի հզոր ամերիկյան դոլարին: Հակառակ դեպքում, այս երկրները կկանգնեն 100 տոկոսանոց տուրքերի առաջ։ Բացի այդ, նրանք կարող են հրաժեշտ տալ իրենց ապրանքները Միացյալ Նահանգների մեծ շուկայում վաճառելու հնարավորությանը», - գրել է Թրամփը Truth սոցիալական ցանցում։
Թրամփը վստահեցրել է, որ Վաշինգտոնը թույլ չի տա, որ դոլարը փոխարինվի միջազգային առևտրում։ Հանրապետականի կարծիքով՝ դոլարին փոխարինելու «շանս չկա»։
«Ցանկացած երկիր, որը կփորձի դա անել, «բարև» կասի մաքսատուրքերին և «ցտեսություն»՝ Ամերիկային»,-վստահեցրել է Թրամփը։
