Նիկոլ Փաշինյանը ներկայացրեց «Իրական Հայաստան» գաղափարախոսության առանցքային դրույթները (տեսանյութ)

«Իրական Հայաստան» գաղափարախոսության առանցքային դրույթներից մեկն այն, որ պետությունը բարեկեցություն կառուցելու գործիք է քաղաքացիների համար: Այս մասին այսօր՝ հունվարի 31-ին, հրավիրված մամուլի ասուլիսում հայտարարեց ՀՀ վարչապետ Նիկոլ Փաշինյանի:

Ըստ Փաշինյանի՝ այդ գաղափարախոսության համաձայն, բարեկեցությունը կարող է կառուցվել միայն աշխատանքի և կրթության, այսինքն՝ կրթության միջոցով ավելի արդյունավետ ու արտադրողական դարձող աշխատանքի, ինչպես նաև՝ անհատական ջանքի միջոցով, և մեր քաղաքականություններն ուղղված են գաղափարական այս թեզի իրագործմանը:

Լրացուցիչ պարզաբանելով այդ թեզը՝ վարչապետն ընդգծեց, որ բարեկեցությունը հնարավոր է, եթե մի քանի գործոններ հանդիպում են իրար և համընկնում են: Դրանցից մեկն աշխատանքն է, մյուսը կրթությունն է, հաջորդը անհատական ջանքն է, և մյուսը պետական քաղաքականություններն են:

«Մեր տեսությունն այն է, որ երբ այս չորս գործոնները կհամընկնեն և կփոխգործակցեն, այդ ժամանակ հնարավոր կլինի հաստատել բարեկեցություն», - հավելեց Փաշինյանը:

Իր բացման խոսքում Նիկոլ Փաշինյանը ներկայացրեց գործնականում իրականացվող աշխատանքները՝ նշելով, որ 2024 թ. դեկտեմբերի արդյունքներով Հայաստանում գրանցվել է ավելի քան 778 հազար (778 094) աշխատատեղ: Այս ցուցանիշը 2018 թ. դեկտեմբերի համեմատությամբ ավել է 189 հազարով կամ 34.4 տոկոսով: Բացի այդ, 2024 թվականի միջին աշխատավարձը եղել է 306 հազար 745 դրամ: 2018 թվականի դեկտեմբերի համեմատ միջին աշխատավարձը աճել է 127 հազար դրամով կամ 71 տոկոսով, իսկ 2023 թվականի համեմատ՝ 18 հազար 699 դրամով 6.5 տոկոսով: Փաշինյանը նաև խոսեց ուսուցիչների և զինվորականների կամավոր ատեստավորման՝ Հայաստանում ներդրված համակարգի մասին, որն աշխատավարձերն ընդհուպ մինչև կրկնապատկելու հնարավորություն է տալիս:

Վարչապետն անդրադարձավ նաև կրթական համակարգին: Փաշինյանի խոսքով՝ մասնագիտական կրթության և ուսուցման, ինչպես նաև՝ բուհական մի շարք  գերակա ուղղություններով սահմանվել է 50 և 70 հազար դրամ ամսական կրթաթոշակ:

Մանրամասները՝ տեսանյութում:

Արամ Սարգսյան