Ես տենց բա՞ն եմ ասել. Նիկոլ Փաշինյանը՝ Շուշիի, Հադրութի դեօկուպացիայի մասին (տեսանյութ)
ՔաղաքականՎարչապետ Նիկոլ Փաշինյանն իր գլխավորած «Քաղաքացիական պայմանագիր» իշխող կուսակցության հետ միասին ոչ միայն չի իրականացնում Ազգային ժողովի 2021 թ. ընտրությունների նախընտրական ծրագրի որոշ կետեր, այլև հրաժարվում է ընդունել, որ ծրագրում այդպիսի կետեր են եղել: Այսօրվա ասուլիսի ընթացքում՝ հարցին, թե ե՞րբ եք վերջապես դուրս գալու խոհանոցից և անցնելու Ձեր նախընտրական ծրագրի իրականացմանը, այդ թվում՝ Շուշիի և Հադրութի դեօկուպացիային, Նիկոլ Փաշինյանը կասկած հայտնեց, որ առհասարակ նման բան ասել է:
«Անկեղծ ասած, զուտ բառապաշարի առումով, կարող եմ մոռացած լինել, բայց ես տենց բա՞ն եմ ասել: Չէ, գուցե կարելի է ինչ-որ մեկնաբանել էդպես, բայց ես տենց բառապաշար օգտագործել ե՞մ: Հա, հենց տե՞նց, հենց տենց բառերո՞վ: Անկեղծ եմ ասում՝ մարդ եմ, չեմ հիշում, որ էդպիսի բառապաշարով ասել եմ», - պատասխանեց Նիկոլ Փաշինյանը:
Նշենք, որ Փաշինյանի գլխավորած «Քաղաքացիական պայմանագիր» կուսակցության նախընտրական ծրագրի՝ «Արցախի հիմնախնդիր» բաժնում կա կոնկրետ կետ նախկին ԼՂԻՄ-ի (Լեռնային Ղարաբաղի Ինքնավար Մարզ) տարածքի դեօկուպացիայի մասին՝ որպես բանակցային գործընթացում Հայաստանի Հանրապետության առաջնահերթության: Այդ կետում նշված է «Բանակցային գործընթացում Հայաստանի առաջնահերթություններից է լինելու այն տարածքների դեօկուպացիան, որի վրա ինքնորոշվել է Արցախի ժողովուրդը, նախևառաջ նախկին ԼՂԻՄ բնակավայրերի վերադարձն Արցախի վերահսկողության ներքո՝ խաղաղ, բանակցային ճանապարհով, ինչը հնարավորություն կտա տեղահանված անձանց վերադառնալ իրենց տները»:
Մանրամասները՝ տեսանյութում:
Արամ Սարգսյան
