Ցեղասպանության ժխտումը ՀՀ-ում քրեական հանցագործություն է. Փաշինյանը՝ իր աղմկահարույց հայտարարության մասին (տեսանյութ)
ՔաղաքականՀայոց ցեղասպանության փաստը անքննելի և անժխտելի է: Այս մասին այսօր՝ հունվարի 31-ին, հրավիրված մամուլի ասուլիսում հայտարարեց ՀՀ վարչապետ Նիկոլ Փաշինյանը՝ պատասխանելով Հայոց ցեղասպանության մասին մեկ շաբաթ ասված իր խոսքերի վերաբերյալ լրագրողի հարցին: Լրագրողը մասնավորապես հետաքրքրվեց, թե միգուցե կան արտաքին ուժե՞ր, որոնք ճնշում են գործադրում Հայաստանի վարչապետի վրա այդ հարցով:
«Ցեղասպանության ժխտումը, ուրացումը կամ հերքումը Հայաստանի Հանրապետությունում քրեական հանցագործություն է, Քրեական օրենսգրքով նախատեսված արարք: Ցեղասպանության փաստը անքննելի է և անժխտելի: Ընդհանրապես զարմանալ կարելի է, թե ինչպես որևէ մեկին կարելի է մեղադրել [Հայոց] ցեղասպանությունը ուրանալու մեջ, երբ նա, երևույթի մասին խոսելիս, ասում է՝ «ցեղասպանություն», ոչ թե ուրիշ բառեր է օգտագործում նկարագրելու համար, ասում է՝ «ցեղասպանություն»», - պատասխանեց Նիկոլ Փաշինյանը:
Վարչապետն այս համատեքստում հիշեց նաև 2024 թ. ապրիլքսանչորսյան իր ուղերձից հետո նույն թեմայով բարձրացած աղմուկի մասին: Փաշինյանի խոսքով՝ այդ աղմուկն այնքան մեծ էր, որ ինքը բացել է պաշտոնական կայքում հրապարակված իր ուղերձը և նորից կարդացել է այն:
«Հարգելիներս, շատ հստակ, աներկբա, անքննելի ձևով արձանագրված է իրողությունը: Ինչի՞ մասին է խոսքը: Հիմա ինչի՞ մասին է խոսքը: Խոսքը լրիվ ուրիշ բանի մասին է: Խոսքը հետևյալի մասին է, որ [Հայոց] ցեղասպանությունը արդյոք մեզ չպե՞տք է դրդի, որ մենք մի հատ էլ անդրադառնանք աշխարհն ընկալելու մեր բանաձևերին», - հավելեց Փաշինյանը:
Հիշեցնենք, որ հունվարի 25-ին վարչապետ Նիկոլ Փաշինյանը Շվեյցարիայում հայ համայնքի ներկայացուցիչների հետ հանդիպման ընթացքում խոսել էր Հայոց ցեղասպանության մասին՝ ասելով, թե պետք է հասկանանք՝ ինչ է տեղի ունեցել և ինչու է տեղի ունեցել:
«Մենք Հայոց ցեղասպանության պատմությանն էլ պետք ա վերադառնանք, պետք ա հասկանանք՝ լավ, ի՞նչ ա տեղի ունեցել և ինչո՞ւ ա տեղի ունեցել, և ինչպե՞ս ենք մենք դա ընկալել, ո՞ւմ միջոցով ենք ընկալել: Ո՞նց ա, 1939 թվին Հայոց ցեղասպանության օրակարգ չի եղել, և ո՞նց ա, որ 1950 թվին Հայոց ցեղասպանության օրակարգ հայտնվել ա: Ո՞նց ա էղել: Էս մենք պե՞տք ա հասկանանք, թե՞ չպետք ա հասկանանք», - ասել էր Փաշինյանը:
Վարչապետի այս խոսքերը Հայաստանում և Սփյուռքում շատերի կողմից ընկալվել էր որպես ցեղասպանության փաստը կասկածի դնող հայտարարություն: ՔՆնադատող հայտարարությամբ հանդես եկավ նաև Ցեղասպանության կանխարգելման Լեմկինի հեղինակավոր ինստիտուտը՝ քննադատելով Հայաստանի վարչապետին՝ Թուրքիայի ժխտողական նարատիվները շարունակելու համար:
Մանրամասները՝ տեսանյութում:
Արամ Սարգսյան
