Հայաստանը «վատ չի զգում» ԵԱՏՄ-ում. Փաշինյանը՝ Հայաստանի ռազմավարական ապագայի մասին (տեսանյութ)

Հայաստանն իրեն «վատ չի զգում» Եվրասիական տնտեսական միությունում (ԵԱՏՄ), բայց մյուս կողմից Հայաստանի կառավարությունը չի կարող անտեսել ժողովրդի շոշափելի հատվածի ձգտումները՝ ձևավորել ռազմավարական տեսլականներ և մտածելու Հայաստանի ռազմավարական ապագայի մասին: Այս մասին այսօր՝ հունվարի 31-ին, հրավիրված մամուլի ասուլիսում նշեց ՀՀ վարչապետ Նիկոլ Փաշինյանը՝ խոսելով ԵԱՏՄ-ին Հայաստանի անդամակցության և դրա ընձեռած հնարավորությունների մասին:

Վարչապետն, ըստ էության, ակնարկեց հանրության մի մասի տրամադրությունը՝ միանալու Եվրոպական միությանը և քաղաքացիական նախաձեռնության կարգով Ազգային ժողով մտած՝ Եվրոպական միությանը Հայաստանի անդամակցության գործընթացի մեկնարկի մասին օրենքի նախագծին, որին Փաշինյանի գլխավորած կառավարությունը հավանություն է տվել:

«Շատ անկեղծ պետք է ասեմ, որ մենք Եվրասիական տնտեսական միությունում վատ չենք զգում մեզ, և ձեր թվերը դրա մասին խոսում են: Ավելին, մենք շահագրգռված ենք Իրանի Իսլամական Հանրապետության հետ մեր հարաբերությունները խորացնելու և զարգացնելու, բայց, մյուս կողմից, մենք չենք կարող չնկատել մեր ժողովրդի առնվազն որոշակի և շատ շոշափելի հատվածի ձգտումները՝ Հայաստանի ապագայի համար ձևավորել ընտրանքներ, տարբերակներ, որովհետև այսօր շատ կարևոր փուլ է, որպեսզի մենք մեր երկրի ռազմավարական ապագայի մասին խոսենք, բայց այդ խոսակցությունը չի կարող տեղի ունենալ, եթե ընտրանք չկա, և մեր բալանսավորման և բալանսավորված արտաքին քաղաքականությունը նաև դրա համար է, որովհետև երբ ընտրություն չկա, ստացվում է, որ մտածելու անհրաժեշտություն էլ չկա առանձնապես: Երկու տարբերակ կա. կա՛մ դու ասում ես՝ դե ընտրություն չկա, մտածելու շատ բան էլ չկա, երկրորդ տարբերակն այն է, որ դու ասում ես՝ մենք պետք է ընտրություն ձևավորենք, որպեսզի ինչի վրա կանգնենք՝ այդ ընտրությունը լինի օրգանիկ, իրական և ոչ թե կեղծ: Մեր քաղաքականությունը դրան է ուղղված, և մենք շարունակելու ճանապարհն այս ուղղությամբ, և այս ճանապարհն էլ մի պրոցես, որտեղ իրական և անկեղծ բարեկամները ոչ իրական և ոչ անկեղծ բարեկամներից գուցե տարբերվեն», - պատասխանեց Նիկոլ Փաշինյանը:

Հիշեցնենք, որ հունվարի 9-ին ՀՀ կառավարությունը հավանություն է տվել «Եվրոպական միությանը Հայաստանի Հանրապետության անդամակցելու գործընթացի մեկնարկի մասին» ՀՀ օրենքի նախագծին, որն այնուհետև սահմանված կարգով պետք է ներկայացվեր Ազգային ժողովի խորհրդարանական ուժերի քննարկմանը: Այս որոշումից հետո Ռուսաստանի Դաշնության փոխվարչապետ, Հայաստան-Ռուսաստան միջկառավարական հանձնաժողովի համանախագահ Ալեքսեյ Օվերչուկը հայտարարեց, որ Ռուսաստանը դա դիտարկում է, որպես ԵԱՏՄ-ից Հայաստանի դուրս գալու սկիզբ: Էկոնոմիկայի նախարար Գևորգ Պապոյանն էլ իր հերթին հայտարարել էր, որ ԵԱՏՄ-ից դուրս գալու հարց տվյալ պահին Հայաստանի օրակարգում չկա:

Մանրամասները՝ տեսանյութում:

Արամ Սարգսյան