Անկախ ամեն ինչից, Մեղրին այսօր Հայաստանի մաս է, իսկ Արցախը՝ ոչ. լրագրողը՝ Նիկոլ Փաշինյանին

Չնայած տարբեր աղբյուրների կողմից տարբեր ժամանակներում հրապարակված փաստերին, այդ թվում՝ նախկին նախագահների պաշտոնական հայտարարություններին, ինչպես նաև՝ ԱՄՆ Պետդեպարտամենտի գաղտնազերծված փաստաթղթերում առկա փաստերին, որ 1997 թվականին Հայաստանը Ադրբեջանից պահանջել է ճանաչել Արցախի անկախությունը, վարչապետ Նիկոլ Փաշինյանն այսօրվա ասուլիսում կրկին պնդեց, որ Հայաստանի նախորդ բոլոր ղեկավարները բանակցել են Լեռնային Ղարաբաղը Ադրբեջանին վերադարձնելու հարցի շուրջ և ճանաչել են Լեռնային Ղարաբաղը Ադրբեջանի մաս: Փաշինյանն այս պնդումն արեց ի պատասխան լրագրողի դիտարկմանը, որ անկախ ամեն ինչից, թե ինչ են բանակցել, այդ թվում՝ 1999 թվականին, միևնույն է, փաստն այն է, որ Մեղրին այսօր Հայաստանի մաս է, իսկ Արցախը՝ ոչ:

«Իրանք ասում են, որ Մեղրին Հայաստանի մաս է, Ղարաբաղը՝ ոչ, ես ասում եմ՝ Ղարաբաղը Հայաստանի մաս չի, որովհետև Հայաստանի մաս չի, և էդ՝ Հայաստանի մաս չլինելը ի սկզբանե ճանաչվել է հենց Ձեր ասած մարդկանց կողմից», - պնդեց Նիկոլ Փաշինյանը:

Գործող վարչապետը կոչ արեց պարզ հասկանալ գործընթացները՝ համոզմունք հայտնելով, որ 1999 թվականին տեղի ունեցած իրադարձությունները ազդել են այսօրվա իրավիճակի վրա:

Արամ Սարգսյան