ԱԱԾ-ն գործ հարուցեց ոչ թե Երևանի «Հանրապետության» հրապարակում «Ղարաբաղ-Ղարաբաղ» երգած թյուրքերի, այլ այդ խայտառակությունը հանրայնացրած հայի դեմ․ Արմեն Այվազյան

Սա նշանակում է, որ Փաշինյանի «իրական Հայաստանում» դրածո իշխանություններն իրենց ուժայիններով պաշտպանելու են թուրքերին և ճնշելու են հայերին։ Աստիճանաբար հայոց դեմ տարվող հոգեբանական պատերազմի այսպիսի հատուկ գործողություններն ավելանալու են։

 

Հայերին սկսում են վարժեցնել թուրքական իշխանության տակ ապրելուն, պարզ ասած՝ թուրքահպատակության։ Հայաստանում արգելված է լինելու Հայոց ցեղասպանության հիշատակումն այն պատմականորեն ճշգրիտ բովանդակությամբ, որը հայտնի է յուրաքանչյուր հայի։ Արևմտյան Հայաստան և Արցախ բառերի գործածումն անգամ արգելվելու է, ուր մնաց թե Արցախի ազատագրության մասին ձայն հանելը։

Պատահական չէ, որ Փաշինյանը գրեթե ամեն օր անձամբ է հարձակվում մեր ազգի և պետության արժեհամակարգային հիմքերի և խորհրդանիշների վրա՝ կատարելով թուրք-ադրբեջանական թշնամիների գործը։

 

Որքան էլ զարմանալի է, կատարվածը որոշ առումով լավ նշան է, դրական երևույթ։ Որովհետև ՀՀ-ի քողարկված բռնազավթումը վերածվում է բացահայտ բռնազավթման, որն արդեն անզեն աչքով տեսանելի է։ Իսկ դա նշանակում է, որ Հայաստանում ինչ-որ պահի սկիզբ է առնելու ոչ թե անպիտան ու կեղծ «քաղաքական պայքար», այլ ազգային-ազատագրական իրական շարժում, որը սրբել-տանելու է հին ու նոր վայ-վերնախավերին ու հիմնելու է Հայաստանի իրական ապագան»: